لە چەمچەماڵ خێرخوازان قوتابخانەیەکی نۆ پۆلی دروستدەکەن

 

مامۆستاییەکی ئایینی کە ساڵانێکە کاری خێرخوازی دەکات سەرپەرشتی پرۆژەکە دەکات و دەڵێت، لە قوتابخانەوە هەموو ئەوانە پێ دەگەیێندرێت کە خزمەت بە دین و خاک دەکەن، بۆیە لە خێرێکی نەبڕاوەدا بەشداردەبن. 

 

مامۆستا ئامانج کانی بەیتەشی، مامۆستایەکی ئایینییە و دەڵێت: بۆ نموونە ئەو مامۆستا ئایینییەی لەو مزگەوتەی تەنیشت قوتابخانەکەوە گوتاردەدات دەبێت لە قوتابخانەوە پێگەیشتبێت، بۆیە دەبێت چۆن مزگەوت دروستدەکرێت بەوجۆرەش قوتابخانە دروستبکرێت، چونکە گەر بڵێین کاری حکومەت هاوکاری هەژاران و دروستکردنی مزگەوتیش ئەرکی حکومەتە، بەڵام کە نەیکات دەبێت چۆن دەست بۆ دروستکردنی مزگەوت دەبەین ئاوهاش قوتابخانە دروستبکەین، چونکە خێرێکی نەبڕاوەیە. 

 

دانیشتووانی نزیک ئەو قوتابخانەیە بە گەورە و بچووکەوە رۆژ دەژمێرن بۆ تەواوکردنی، چونکە رێگەی دووری گەیشتنی منداڵەکانیان بۆ قوتابخانە نزیک دەکاتەوە. قوتابخانەکە نۆ پۆلییە، یاریگە و باخچەی هەیە و زیاتر لە 300 قوتابی دەتوانن وانەی تێدا بخوێنن. 

 

فەرهاد عەلی، دانیشتوویەکی ئەو گەڕەکەیە و دەڵێت: منداڵەکانمان بەپێ دەچن بۆ قوتابخانە، هەموو گیانیان دەبێتە قوڕ لەبەر باران و دووریی قوتابخانە. 

 

ئەحمەد محەممەد، دانیشتوویەکی دیکەی گەڕەکەکەیە و دەڵێت: جاری واهەیە دەبێت بچین بەپیری منداڵەکانمانەوە بزانین چییان بەسەرهاتووە لەبەر باران و دۆخی خراپی رێگەکە. ئەم پرۆژەیە زۆر چاکە. 

 

لە سنووری قەزای چەمچەماڵ کە حەوت شارۆچکە هەن، 54 هەزار قوتابی لە 197 قوتابخانە و باڵەخانەی پەروەردە وانە دەخوێنن، بۆ دروستکردنی باڵەخانەی نوێ پەنا دەبرێتە بەر خێرخوازان. 

 

عەبدوڵڵا حەمەکاکە رەش، بەڕێوەبەری پەروەردەی چەمچەماڵ بە رووداوی گوت: 10 بینامان پێویستە بۆ ئەوەی کێشەی قوتابخانەکانمان چارەسەرببن. زۆرینەی بیناکانی دیکەیشمان پێویستیان بە نۆژەنکردنەوە هەیە. 

 

لە سنووری پەروەردەی چەمچەماڵ دوو قوتابخانە هەن کە بەتەواونەکراوی بەجێهێڵدراون، دوای تەواوکردنیان قوتابییان لە چوار و سێ دەوامیی رزگار دەکەن.