رووداو دیجیتاڵ
لە راپەڕین کێشەی نەبوونی پزیشکی پسپۆڕ و نەخۆشخانەی تایبەت بە نەخۆشیی شێرپەنجە هەیە. بەڕێوەبەری نەخۆشخانەی گشتیی رانیە دەڵێت، چەندینجار داوایان لە وەزارەتی تەندروستی کردووە چارەسەری کێشەکانیان بکات، بەڵام تاوەکو ئێستا چارەسەر نەکراوە.
ئەمڕۆ شەممە، 29ـی ئادار، د. دابان محەممەد، بەڕێوەبەری نەخۆشخانەی گشتیی رانیە بە رووداوی راگەیاند، "یەکێک لە کێشە گەورەکانی سنووری دەڤەری راپەڕین، نەبوونی پسپۆڕییەکانی وردی نەخۆشییەکانی دڵ و پسپۆڕی نەشتەرگەریی دڵە، ئەمە جگە لەوەی پسپۆڕییەکانی مێشک و دەمار و بێهۆشکاریشمان زۆر کەمە."
د. دابان محەممەد گوتیشی، "نەبوونی بەشی چاودێریی چڕ لە رانیە یەکێکی دیکەیە لە کێشەکان، نەخۆشێک ئەگەر پێویستی بەو بەشە بێت یان نەشتەرگەری بۆ کرابێت، دەبێت رەوانەی هەولێر یان سلێمانی بکەین، ئەو کەسانەش کە لە رووداوەکاندا تووشی کێشەی بڕبڕەکان و مێشک دێن، ناچارین رەوانەی سلێمانی و هەولێریان بکەین."
بەگوتەی بەڕێوەبەری نەخۆشخانەکە، چەندین جار داوایان لە وەزارەتی تەندروستی کردووە کە چارەسەری کێشەکانیان بکات، بەڵام وەک ئەو ئاماژەی پێدەکات، "ویست بۆ چارەسەرکردنی کێشەکان نییە."
لەبارەی پسپۆڕی و نەخۆشخانەی تایبەت بە نەخۆشییەکانی شێرپەنجە، د. دابان محەممەد باسی لەوە کرد، "لە تەواوی دەڤەری راپەڕین، هیچ پسپۆڕییەکی نەخۆشییەکانی شێرپەنجە و نەخۆشخانە و ناوەندی چارەسەرکردنمان نییە، ئەوەش وایکردووە سەرجەم نەخۆشانی شێرپەنجەی ئەم دەڤەرە بەرەو هەولێر یان سلێمانی بڕۆن."
بەڕێوەبەری نەخۆشخانەکە باسی ئەوەش دەکات، "خێرخوازێک بڕیاریداوە باڵەخانەی نەخۆشخانەیەکی تایبەت بە شێرپەنجە لە رانیە دروست بکات، زەوی بۆ دابینکراوە، بەڵام دیار نییە کەی دەست بە دروستکردنی دەکرێت."
بۆ گەیاندنی دەنگی تووشبووانی شێرپەنجەی ئەو دەڤەرە، رووداو، رەفیق عەبدوڵڵای دواند، کە تووشبوویەکی شێرپەنجەی دانیشتووی رانیەیە، ئەو گوتی، "نەبوونی نەخۆشخانەی تایبەت بە شێرپەنجە، وایکردووە تووشی مەینەتی زۆر ببین، من خۆم ئێستا دوو مانگ جارێک لە پرۆسەی چاودێریی کردنم، بەڵام پێشتر دەبوو هەموو رۆژێک لە رانیەوە بچمە سلێمانی بۆ چارەسەر وەرگرتن، لە هەشتی بەیانییەوە بۆ هەشتی ئێوارە دەبوو لەوێ بمێنمەوە و رۆژی دواتر دووبارە بڕۆمەوە."
وەک رەفیق عەبدوڵڵا دەڵێت، سەتان تووشبووی شێرپەنجە لە دەڤەری راپەڕین هەمان کێشەی ئەویان هەیە.
ئەو تووشبووەی شێرپەنجە گوتیشی، "سیستمی نەخۆشخانەی هیوا بەتایبەتی کە ئەلیکترۆنییە، دەبێت بەیانیان زوو پێڕابگەیت، ئەگەرنا زۆر درەنگتر پرۆسەی چارەسەرییت بەردەکەوێت، ئەوەش وایکردووە نەخۆشەکان ناچاربن بەیانیان زوو لە رانیەوە بەرەو سلێمانی بەڕێبکەون، کە ماوەی نێوانیان نزیکی دوو کاژێرە."
رەفیق عەبدوڵڵا ئاماژەی بەوەش کرد، "ئێمە خۆمان کە تووشبووی شێرپەنجەین، بەرگریی جەستەمان زۆر کەمە و جەستەمان لاواز بووە، بڕینی ئەو رێگە دوور و درێژانە زۆر ئازارمان دەدات."
بەگوێرەی دوایین ئامارەکان، ژمارەی دانیشتووانی سنووری دەڤەری راپەڕین، نزیکەی 500 هەزار کەسە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ