لە هەولێر فرۆشتنی ڤەیپ قەدەخەیە و لە سلێمانی ئازادە

 

 

بەگوێرەی زانیارییەکانی تۆڕی میدیایی رووداو، لە شاری هەولێر بە سەرجەم دووکانەکانی فرشتنی ڤەیپ و نێرگەلە گوتراوە، نابێت ڤەیپ بفرۆشن و بە پێچەوانەوە سزا دەدرێن.

 

بەرپرسێکی باڵای کارگێڕی لە هەولێر ئەمڕۆ دووشەممە بە تۆڕی میدیایی رووداوی گوت، "هەر دووکان و مارکێتێک ڤەیپ بفرۆشێت لەلایەن لیژنە هاوبەشەکانی قایمقامیەتی هەولێرەوە لێپێچینەوەی یاسایی لێدەکرێت."

 

ڤەیپ لە هەولێر بە فەرمی قەدەخەیە و دووکانەکان نایفرۆشن، بەڵام بەگوێرەی زانیارییەکان، هێشتا لە رێگەی ئۆنلاین و "بە دزییەوە" دەفرۆشرێت.

 

لە دهۆک بڕیاری قەدەخەکردنی فرۆشتنی ڤەیپ دراوە، بەڵام چەند رۆژێک کات بە فرۆشیاران دراوە، کە خۆیان ڤەیپەکان کۆبکەنەوە و لە شارەکە دووری بخەنەوە. ئیسماعیل محەممەد، قایمقامی دهۆک ئەمڕۆ دووشەممە بە تۆڕی میدیایی رووداوی راگەیاند، "چەند رۆژێکی کەم کات ماوە بۆ فرۆشیارەکان و دواتر رێگە نادرێت هیچ دووکانێک ڤەیپ بفرۆشێت، بە پێچەوانەشەوە لێپیچینەوەی یاساییان لەگەڵدا دەکرێت."

 

فرۆشتنی ڤەیپ لە سلێمانی ئاساییە، لایەنی پەیوەندیدار نایانەوێت لەو بارەیەوە قسە بکەن، بەڵام فرۆشیارێکی ڤەیپ و نێرگەلە لە شاری سلێمانی ئەمڕۆ بە رووداوی گوت، "ئێستا دەیان جۆر ڤەیپم هەیە و دەیفرۆشم، دەنگۆیەک هەبوو قەدەخە دەکرێت لێرە، بەڵام راست نییە و تاوەکو ئێستا ئاگادار نەکراوینەتەوە."

 

بڕیاری قەدەخەکردنی ڤەیپ لە هەولێر و دهۆک لەکاتێکدایە، رۆژی چوارشەممە، 28-12-2023، تۆڕی میدیایی رووداو راپۆرتێکی بنکۆڵکاری لەبارەی فرۆشتنی ڤەیپ لە هەرێمی کوردستان بڵاوکردەوە و دەرکەوت ڤەیب بە ئاشکرا بە منداڵان و مێرمنداڵان دەفرۆشرێت.

 

دوای بڵاوبوونەوەی راپۆرتەکەی تۆڕی میدیایی رووداو، نەوزاد شێخ کامیل، بەڕێوەبەری گشتیی بازرگانیی هەرێمی کوردستان بە تۆڕی میدیایی رووداوی گوت: "لەسەر داوای وەزارەتی تەندروستی، داواکاری گشتی بڕیاری قەدەخەکردنی ڤەیپی دەرکردووە و لە ساڵی نوێوە فرۆشتنی قەدەخە دەکرێت؛ بۆ ئەوەش سەرجەم شوێنەکانی فرۆشتنی ڤەیپ ئاگادارکراونەتەوە تاوەکو ساڵی نوێ هەموو ڤەیپەکان لەنێوببەن".