قوباد تاڵەبانی: ئەگەر ناوماڵی کوردستان یەکنەخەینەوە قەوارەی هەرێمی کوردستان نامێنێت

 

 شاندی دانوستاندکاری نێوان هەولێر و بەغدا لە ساڵی 2020ـدا سێ جار سەردانی پەرلەمانی کوردستانی کردووە. شاندەکە 4 کاژێر لەگەڵ سەرۆکایەتیی پەرلەمان و فراکسیۆنەکان و لیژنە تایبەتمەندەکانی پەرلەمان کۆبوونەوە. 

 

ئەو کۆبوونەوەیە وردەکاریی دانوستاندنەکانی نێوان هەولێر و بەغدای تێدا خرایەڕوو. شاندەکەی حکومەت بە پەرلەمانی کوردستانی گوت کە لەگەڵ پەسندکردنی بودجەی 2021ـی عێراقدا بەبێ هیچ گرفتێک 250 هەزار بەرمیل نەوت رادەستی کۆمپانیای سۆمۆ دەکەن و ئەوەی دستوور وەک ئەرکی هەرێمی کوردستانی داناوە جێبەجێی دەکەن.

 

قوباد تاڵەبانی، سەرۆکی شاندی دانوستاندکاری هەرێمی کوردستان لەگەڵ حکومەتی عێراق رایگەیاند: "ئەوەی تاوەکو ئێستا هەیە رێککەوتنێکە لەسەر بودجەی 2021 کە بەشی پەیوەندیی بە هەرێمی کوردستانەوە هەیە. ئێمە وەکو حکومەتی هەرێمی کوردستان ئەو بەشەی پەیوەندیی بە هەرێمی کوردستانەوە هەیە هەم پێی رازیین هەم ئامادەین 250 هەزار بەرمیل نەوت لە رێگەی سۆمۆوە بفرۆشین."

 

هەرێمی کوردستان نیوەی رێگەی بۆ وەرگرتنی شایستە داراییەکانی لەگەڵ عێراق بڕیوە، بەڵام رێگە سەختەکە ماوە کە دیار نییە کورد دەگاتە کۆتاییەکەی یاخود نا. ئەویش پەسندکردیەتی لە پەرلەمانی عێراق. بۆیە بۆ هەڵگرتنی بەربەستە سیاسییەکان ئامادەکاری بۆ چوونی شاندێکی سیاسیی هەرێمی کوردستان بۆ بەغدا دەکرێت.

 

هێمن هەورامی، جێگری سەرۆکی پەرلەمانی کوردستان رایەگەیاند: "هەر کاتێک پێویست بێت ئەم شاندە دەڕوات و، لە کۆبوونەوەی سێ سەرۆکایەتییەکەدا ئەم بابەتە گفتوگۆی لەسەر کراوە. شاندی دانوستانکاری هەرێمی کوردستان پێویستی بە پشتیوانیی سیاسیی پەرلەمانی کوردستان و لایەنە سیاسییەکان هەیە."

 

لە کۆبوونەوەکەی نێوان حکومەت و پەرلەماندا هەردوو ئەگەری رێککەوتن یاخود رێکنەکەوتن لەگەڵ بەغدا گەنگەشە کراون.

لەوانە پلانی دوای ئەگەری رێکنەکەوتنی نێوان هەولێر و بەغدا کە حکومەتی هەرێمی کوردستان هاوتەریب لەگەڵ زیادکردنی داهات و جێبەجێکردنی چاکسازی، بە گوێرەی داهاتی بەردەستی هەرچەندێک بێت مانگانە مووچەیەک دابەش بکات.

 

هاوکات فراکسیۆنەکانی کۆمەڵ و یەکگرتووی ئیسلامی کۆبوونەوەکەیان بایکۆت کرد .

عەبدولستار مەجید، سەرۆکی فراکسیۆنی کۆمەڵ لە پەرلەمانی کوردستان گوتی: "پێمان وایە دەبوو ئەم جۆرە کۆبوونەوەیە لە هۆڵی پەرلەماندا و بە ئامادەبوونی گشت پەرلەمانتاران بێت، چونکە ئەو بابەتە گشتییە و پەیوەندیی بە هەموو هاووڵاتییەکی هەرێمی کوردستانەوە هەیە."

 

بڕیارە لە دەستپێکی ساڵی داهاتوودا شاندی دانوستاندنکاری هەرێمی کوردستان سەردانی لایەنە سیاسییەکانی هەرێمی کوردستان بکات و پێیان بڵێت کە دەیانەوێت دەرگای کێشە داراییەکان لەگەڵ بەغدا دابخەن ئەگەر لایەنە سیاسییەکان لە بەغدا لێبگەڕێن؛ ئەو لایەنە سیاسییانەی لە بەردەم نوێنەرانی کۆمەڵگەی نێودەوڵەتیدا دەستوور پێشێل دەکەن.