سەرچاوەیەک بۆ رووداو: 761 ملیار دینار بۆ مووچەی مانگی 10 خەرج کرا

 

 

ئەمڕۆ پێنجشەممە، 28ـی تشرینی دووەمی 2024، هەڵکەوت عەزیز، پەیامنێری رووداو لە بووڵتەنی کاژێر 05:00 گوتی: "سەرچاوەیەک لە ئەنجوومەنی وەزیرانی عێراق پێی راگەیاندووم؛ وەزارەتی دارایی رەزامەندی لەسەر ناردنی 761 ملیار دینار بۆ هەرێمی کوردستان داوە و نووسراوی خەرجکردنەکەی کراوە."

 

بە گوێرەی زانیارییەکانی هەڵکەوت عەزیز، "خەرجکردنی پارەکە دەرەنجامی گفتوگۆی نێوان سەرۆکوەزیرانی عێراق، سەرۆکی دادگەی فیدراڵی و وەزیری دارایی عێراق بووە."

 

پەیامنێری رووداو دەڵێت، وەزارەتی دارایی رەزامەندی لەسەر ئەوە دەربڕیوە کە "بۆ مانگی 10 و 11 و 12 بڕی 763 ملیار دینار خەرج بکرێت، بەڵام هێشتا روون نییە بۆچی بۆ ئەم مانگە 2 ملیاری کەمترە لە بڕە دیاریکراوەکە."

 

تیمێکی وەزارەتی دارایی هەرێمی کوردستان لە بەغدان؛ هەڵکەوت عەزیز گوتی: "کاری تیمەکە ئەوەیە؛ هەر تێبینی، کێشە و گرفتێک لە لیستی مانگی 11 هەبێت چارەسەری بکەن، بۆ ئەوەی پارەی ئەو مانگەش یەکسەر خەرج بکرێت."