شاندی حکومەت سەردانی سێ‌ حیزبی دیکە دەكات

رووداو - هەولێر

شاندی حكومەتی هەرێمی كوردستان بەسەرۆکایەتیی نێچیرڤان بارزانی و قوباد تاڵەبانی سەردانی هەریەك لە حیزبەكانی پارتی ‌و شیوعی ‌و زەحمەتكێشان دەكات.

سەمیر هەورامی، سكرتێری رۆژنامەڤانیی قوباد تاڵەبانی، جێگری سەرۆكوەزیران بە (تۆڕی میدیایی رووداو)ی راگەیاند، رۆژی سێشمەممە 28-11-2017 شاندێكی سەرۆكایەتیی حكومەتی هەرێمی كوردستان بەسەرۆكایەتیی نێچیرڤان بارزانی، سەرۆكی حكومەت‌ و قوباد تاڵەبانی، جێگری سەرۆكی حكومەت لە شاری هەولێر سەردانی پارتی دیموكراتی كوردستان، حیزبی شیوعی ‌و حیزبی زەحمەتكێشان دەكات.

سەمیر هەورامی ئاماژەی بەوەدا کە سەردانەكە سەرەتا بۆ لای مەكتەبی سیاسی پارتی دەبێت، دواتر سەردانی حیزبەكانی شیوعی ‌و زحمەتكێشان دەكرێت.

بەمەبەستی چارەسەرکردنی کێشە و تێپەڕاندنی قەیرانەکان، تاوەکو ئێستا شاندەکەی حکومەت سەردانی یەکگرتووی ئیسلامیی کوردستان، بزووتنەوەی گۆڕان، یەکێتیی نیشتمانیی کوردستان و سۆسیالیست دیموکراتی کوردستانی کردووە، بڕیارە سەردانی سەرجەم لایەنەکانیش بکات.

ئەو سەردانانە لەكاتێكدان كە لەدوای گشتپرسی و رووداوەکانی 16 ی ئۆکتۆبەرەوە، ئەمریكا پشتیوانی خۆی بۆ بەردەوامبوونی کابینەی هەشتەمی حكومەتی هەرێمی كوردستانی بەسەرۆكایەتیی نێچیرڤان بارزانی ‌و قوباد تاڵەبانی دەربڕیوە، تاوەکو هەڵبژاردن ئەنجامدەدرێت.

پێداچوونەوە: دەرباز ساڵح

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger