لە دهۆک سێ منداڵی یەک خێزان تەلاسیمیایان هەیە و چارەسەریان لە دەرەوەی وڵاتە

 

چنار عەبدوڵڵا، دایکی منداڵە نەخۆشەکانە و بە قوڕگی پڕ لە گریانەوە دەڵێت، "سێ نەخۆشم هەیە. یەکێکیان تەندروستیی باشە. باوکیشیان نەخۆشە. کچەکەم پێویستیی بە نەشتەرگەری هەیە. ئەوە چەندە هەر دەڵێین ئارام دەگرین، چارەسەر دەبێت، هیچ شوێنێکمان نەهێشتووە هانای بۆ نەبەین. دوو جار نەشتەرگەریمان بۆ دەستی کردووە. بردمان بۆ هەولێر، گوتیان سێ هەزار و 500 دۆلار پێویستە، بۆیە ناچاربووین لەبەر هەرزانی بیبەینە موسڵ و لەوێ دەستی کچەکەمیان سەقەت کرد. داوامان لە خێرخوازان ئەوەیە، وەکو کچی خۆیان تەماشای بکەن."

 

شڤان رەمەزان، باوکی منداڵەکانە و شێرپەنجەی پێستی هەیە. ناتوانێت خەرجیی ماڵەوە و چارەسەریی منداڵەکانی دابین بکەت. ئەو دەڵێت، "خەمی نەخۆشییەکەمم نییە، خەمی گەورەم کچەکەمە."  

 

پزیشکی تایبەتمەند پشکنینی بۆ منداڵەکان کردووە، چارەسەریان لە هیندستان و تورکیا هەیە. بەڵام بۆ ئەوە، پێویستیان بە 50 هەزار دۆلار هەیە، کە بۆ خێزانەکە بڕە پارەیەکی زۆرە و توانای دابینکردنییان نییە. 

 

ئومێد عەدنان، پزیشکی تایبەتمەندە و دەڵێت، "بەداخەوە، [ئەم نەشتەرگەرییە] لە تەواوی عێراق ناکرێت. لە سڵێمانی نەشتەرگەرییەکە دەکرێت، بەڵام تەنیا بۆ تەلەسیمیا دەکرێت. پێویستە کەسی بەخشەر 100٪ خوێنەکەی بۆ نەخۆش ببێت. نەشتەرگەرییەکە لە تورکیا و هیندستان دەکرێت."