هاونیشتمانییەک لە دەستی گرووپێکی چەکدار رزگار دەکرێ

 

شەوی چوارشەممە، 28ـی ئابی 2024، حەسەن رەشید هەلاج، کە شۆفێرێکی نێوان قەزای کفری- بەغدایە و رۆژی سێشەممە لەلایەن ژمارەیەک چەکدارەوە رفێندرابوو، ئازادکرا و گەیشتەوە ماڵەکەی خۆی.

 

بەپێی زانیارییەکانی رووداو، ئەو شۆفێرە کاژێر 2:00ی پاشنیوەڕۆی دوێنێ سێشەممە 27ـی ئاب، لە نزیک ناحیەی عوزێمی پارێزگای دیالە، لەکاتی هاتنەوەی لە بەغداوە بۆ قەزای کفری لەلایەن ژمارەیەک چەکدارەوە رێگەی پێدەگیرێت و لە ئۆتۆمبێلەکەی دایدەگرن و ئەو خێزانەی لەنێو ئۆتۆمبێلەکەیدا بوون رێگەی چوونیان پێدەدرێت و تەنیا ئەو دەڕفێنن.

 

ئەو شۆفێرە کە ساڵانێکی زۆرە لەو رێگەیە کاردەکات، دوای دەستگیرکردن و کەلەپچەکردنی، دەخرێتە نێو چاڵێکەوە و دواتر بۆ شوێنێک دەبرێت و ئەشکەنجەی زۆر دەدرێت و لەرێگەی تەلەفۆنەوە رفێنەران داوای 40 دەفتەر دۆلار(400 هەزار دۆلار)دەکەن.

 

ئاسایشی نیشتمانیی عێراق هاونیشتمانییەکە رزگار دەکەن و بەشێک لە گرووپە چەکدارەکە دەستگیر دەکەن. موسەننا تەمیمی، پارێزگاری پێشووی دیالە و ئەنجامی ئێستای ئەنجوومەنی پارێزگاکە، دوای رزگارکردنی حەسەن رەشید، ئەمڕۆ پێشوازیی لێکرد. دەستخۆشیشی لە ئاسایشی نیشتمانیی عێراق کرد کە توانیان لە دەستی رفێنەران رزگاری بکەن.

 

بەپێی زانیارییەکانی رووداو، ئەوانەی حەسەن رەشید هەلاجی شۆفێریان دەستگیرکردبوو، چەکداری داعش نەبوون و تەنیا بەمەبەستی وەرگرتنی پارە ئەو کارەیان کردبوو.

 

رێگەی نێوان عوزێم - بەغدا پێشتر یەکێک بوو لە رێگە مەترسیدارەکان کە چەکداران زۆر جار شۆفێریان تێدا رفاندووە، بەتایبەت کورد. جگە لەوەش رێکخراوە تووندئاژۆکان چەندین کەسیان لەسەر ئەو رێگەیە کوشتووە دوای دانانی بۆسە بۆیان.