تۆمەتبار بە کوشتنی ئاری (لای راست)، ئاریی چایچی، (لای چەپ)
رووداو دیجیتاڵ
بەڕێوەبەرایەتی ئاسایشی سلێمانی رایگەیاند "بکوژی" ئەو هاونیشتمانییەیان دەستگیرکردووە کە شەوی رابردوو کوژرا.
بەڕێوەبەرایەتیی گشتیی ئاسایشی سلێمانی لە راگەیێندراوێکدا ئەمڕۆ (یەکشەممە، 28-7-2024) رایگەیاند "پاش ئەوەی کاژێر 9:30ـی شەوی 27-7-2024 لە گەڕەکی راپەڕینی شاری سلێمانی گرژی و ئاڵۆزی دروست دەبێت، بەداخەوە دەبێتە هۆی گیان لەدەستدانی كاسبكاريك."
ئاسایشی گشتیی سلێمانی وێنەی تۆمەتبارەکەی لەگەڵ راگەیێندراوەکە بڵاوکردووەتەوە و دەشڵێ راستەوخۆ هێزەکانی ئاسایش گەیشتوونەتە شوێنی رووداوەکە و تۆمەتبار دەستگیرکرا، "هاوەڵەکەشی لەلایەن هێزەکانی کۆماندۆی كوردستانەوه بەتۆمەتی هاوکاریکردنی بکوژەکە، رادەستی دەزگاى ئاسایش کرا."
رووداوەکە چۆن روویدا؟
لە رووداوێکی تەقەکردندا لە سلێمانی، شەوی رابردوو کەسێک کوژرا و کەسێکی دیکەش بە گوللە بریندار بوو. کوژراوەکە ناوی ئاری رزگارە و پیشەی چایچی بووە.
رووداوی تەقەکردنەکە لە گەڕەکی راپەڕین روویدا، لە شوێنێک کە پێی دەگوترێت شوێنی لەفەفرۆشەکان.
تەرمی چایچییەکە شەوی رابردوو راستەوخۆ گەیێنرایە داد پزیشکیی سلێمانی. ئاری گوللـەیەک بە سەری کەوتبوو و هەر لە شوێنی رووداوەکەدا گیانی لەدەستدابوو، هاونیشتمانییەکەی دیکەش بە برینداری گەیەنرایە نەخۆشخانەی شار، "بریندارەکە گوللە بە قاچی کەوتووە و مەترسی لەسەر ژیانی نییە."
یەکێک لە شاهێدحاڵەکان کە لە نزیک چایچییەکە کاردەکات و لە ساتی رووداوەکەدا لەو شوێنە بووە، شەوی رابردوو لەبەردەم دادپزیشکییەوە بە بە رووداوی گوت، "خەریکی کار و کەسابەت بووین، کاتێک کەسەکە هات و دەستی بە جوێندان کرد، ئێمە بەرگریمان لە خۆمان کرد، کە دووریبخەینەوە، بەڵام قسەی نەدەبیست و دەستی کرد بە تەقەکردن."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ