رووداو- هەولێر
سەرپەرشتیاری ئیدارەی سەربەخۆی سۆران رایگەیاند، لە رووداوەکەی هاتووچۆی ئەمڕۆی نێوان مینی پاسێک و کۆستەرێکدا لە گەلی عەلی بەگ، 36 کەس برینداربوون و رەوشی چواریان باش نەبوو و، بەو هۆیەوە رەوانەی نەخۆشخانەکانی هەولێر کران؛ دەشڵێت: "داوام لە بەڕێوەبەرایەتیی هاتووچۆ کردووە راپۆرتی خۆیان لەبارەی رووداوەکەوە ئامادە بکەن و لایەنی کەمتەرخەمیش دەستنیشانبکەن."
رۆژی پێنجشەممە، 28ـی تەممووزی 2022، هەڵگورد شێخ نەجیب، سەرپەرشتیاری ئیدارەی سەربەخۆی سۆران بە تۆڕی میدیایی رووداوی گوت: "بەهۆی ئەو رووداوەی ئەمڕۆ لە گەلی عەلی بەگ لە ئەنجامی پێکدادانی مینی پاسێک و کۆستەرێک روویدا، 36 کەس برینداربوون، چواریان رەوانەی نەخۆشخانەکانی هەولێر کراون، چونکە رەوشی تەندروستییان باش نەبوو."
هەڵگورد شێخ نەجیب گوتیشی: "داوامان لە بەڕێوەبەرایەتیی هاتووچۆ کردووە راپۆرتی خۆیانمان پێبدەن و لایەنی کەمتەرخەمیش دیاری بکەن، چونکە شۆفێری تەنیا رۆیشتن لە رێگە نییە؛ سەلامەتی و گەیشتن بە شوێنی مەبەست بە دروستی گرنگترە."
دوای رووداوەکەی ئەمڕۆ، سەرپەرشتیاری ئیدارەی سەربەخۆی سۆران سەردانی نەخۆشخانەی ئاشتی کرد و لە رەوشی تەندروستیی بریندارانی پرسی.
بەپێی بەڕێوەبەرایەتیی گشتیی هاتووچۆی هەرێمی کوردستان، لە ساڵی 2021دا زیاتر لە چوار هەزار و 119 رووداوی هاتووچۆ روویانداوە، بەهۆیەوە 662 کەس گیانیان لەدەستداوە و حەوت هەزار و 220 کەسیش برینداربوون، هەروەها زیاتر لە 122 هەزار ئۆتۆمبێل لە بەڕێوەبەرایەتیی هاتووچۆی پارێزگاکان تۆماركراون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ