هەڵەیەک روویدا! دووبارە هەوڵبدە
جەژنی قوربان لە بەرواری باڵا
رووداو دیجیتاڵ
لە گوندی هرووری دەڤەری بەرواری باڵا، وەکو نەریتی باب و باپیرانیان ئەم جەژنەش گوندنشینان لە ماڵێکی گوندەکە کۆبوونەوە و بەیەکەوە ژەمی بەیانییان خوارد.
ژەمی بەیانیی جەژنی قوربانی گوندەکە پێکهاتبوو لە قەلی، نیسک، پەتاتە و بەرهەمەکانی شیرەمەنی.
رێبەر رووشدی، فەرمانبەر و خەڵکی گوندەکە باسی ئەوە دەکات ئەو جۆرە میوانداریکردنە هەرجارە و لە ماڵی کەسێک دەبێت، دەڵێ "ئەمجارەیان لە ماڵی مام مەکیی هرووری بوو، ئەوەش نیشانی دەدات کە گوندی هروور، گوندێکی یەکگرتووە و ئارامیی گوندەکە چەند گرنگە".
دوای ژەمی بەیانی، گوندنشینان بەیەکەوە هاوشێوەی باب و باپیرانیان بە گوتنەوەی گۆرانیی فۆلکلۆری و کەیفخۆشییەوە، ماڵ بە ماڵ گەڕان و جەژنەپیرۆزەیان لە یەکدی کرد.
جەعفەر عەلی، پێشمەرگەی خانەنشینە و خەڵکی گوندەکەیە، بەمشێوەیە باسی جەژنی کاتی گەنجیی خۆی لە گوندەکە دەکات و دەڵێ "لێرە 20 سەربان هەبوون، ئێمە لەو سەربانانە شاییمان دەکرد... هەتاوەکو پێش بەرەبەیان شایی و کەیفمان دەکرد".
مەسیحی و موسڵمان جەژنە پیرۆزە لە یەکدی دەکەن
لە گوندێکی دیکەی دەڤەری بەرواری باڵا بەناوی گوندی بازێ، جیاواز لە گوندەکانی دیکە موسڵمان و مەسیحی بەیەکەوە دەژین، هەردوو پێکهاتەی ئایینی گوندەکە ماڵ بە ماڵی دانیشتووە موسڵمانەکانی گوندەکە بەسەردەکەنەوە و جەژنەپیرۆزەیان لێ دەکەن.
حەسەن سەعید، جووتیارێکی گوندەکەیە و دەڵێ "لە گوندەکەمان پەیڕەوانی دوو ئایین هەن؛ موسڵمان و مەسیحی، هیچ کێشەیەکمان لەگەڵ یەکدیدا نییە، جەژن بێت دەچینە سەردانی یەکتر، پرسە بێت هەر بەیەکەوەین. ئایینیشمان جیایە، ئەوان دەچنە دێر و ئێمە دەچینە مزگەوت".
هاونیشتمانییەکی مەسیحیی گوندەکە بەناوی ئەدیب یوسف باس لەوە دەکات "هەموو جەژنێک ئێمە لەگەڵ برا موسڵمانەکانمان دەگەڕێین، ئەوانیش بەهەمان شێوە لە جەژندا ماڵ بە ماڵمان بەسەردەکەنەوە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ