پۆلیسی سلێمانی: کەسێکمان بە تۆمەتی 'دەستبڕینی' کەسانی بەتەمەن و خانەنشین دەستگیر کرد
رووداو دیجیتاڵ
بەڕێوەبەرایەتیی پۆلیسی سلێمانی رایدەگەیێنێت، کەسێکیان لە سنووری دەربەندیخان دەستگیر کردووە کە فێڵی لە کەسانی بەتەمەن و خانەنشینان کردووە و "دەستی بڕیون."
بەپێی راگەیێندراوی پۆلیسی سلێمانی، دوای تۆمارکردنی چەند سکاڵایەکی یاسایی لەلایەن ژمارەیەک ھاوڵاتیی بەتەمەن و خانەنشینەوە کە "لەکاتی وەرگرتنی مووچەکانیاندا تۆمەتبارێک فێڵی لێکردوون، فریوی داون و بە بیانووی جۆراوجۆر پارەی لێ سەندوون، دەستبەجێ ھێزەکانی پۆلیس لێکۆڵینەوەکانیان بۆ دۆزینەوە و دەستگیرکردنی تۆمەتبار دەستپێکرد."
پۆلیسی دەربەندیخان توانیویەتی تۆمەتبارەکە بدۆزێتەوە و لەلایەن مەفرەزەکانیانەوە دەستگیر کراوە. هەروەها لەکاتی دەستگیرکردنیدا دەستیش گیراوە بەسەر ئۆتۆمبێلی تۆمەتباردا کە بڕیاری دەستبەسەرداگرتنی ھەبووە.
تۆمەتبارەکە ناوی "ھ. ع. مـ"ـە و وەکو بەڕێوەبەرایەتیی پۆلیسی سلێمانی دەڵێت، دانی بە تاوانەکەیدا ناوە، ئێستاش بە بڕیاری دادوەر و بەپێی مادەی 456 لە یاسای سزادان راگیراوە و لێکۆڵینەوەکان بەردەوامە.