لە کەرکووک پارتی و نەوەی نوێ بەشداریی کۆبوونەوەیەک ناکەن

 

کۆبوونەوەی ئەمڕۆی حیزبە کوردستانییەکان لە بارەگای مەڵبەندی یەکێتییە لە کەرکووک. هەردی محەممەد پەیامنێری رووداو رایگەیاند، جگە لە پارتی دیموکراتی کوردستان و نەوەی نوێ حیزبە کوردستانییەکانی دیکە لە کۆبوونەوەکە بەشدارن. ئەمەش لەبەرئەوەی پارتی خۆی لە کەرکووک نییە و نەوەی نوێش پێشتر و ئێستاش بەشداریی هیچ کۆبوونەوەیەکی نەکردووە. 

 

رۆژی 05-05-2021 دوایین وادەیە بۆ پێشکێشکردنی هاوپەیمانیێتی لایەنەکان بۆ هەڵبژاردنی پەرلەمانی عێراق. پەیامنێری رووداو دەڵێت، کۆبوونەوەکەی ئەمڕۆ رەنگە دوایین کۆبوونەوەی حیزبە کوردستانییەکان بێت لەسەر پرسی هەڵبژاردن و بڕیار لەبارەی هاوپەیمانیێتییەکە بدرێت.

 

تاوەکو ئێستا حیزبە کوردستانییەکان 15 کۆبوونەوە زیاتریان کردووە و ئەم کۆبوونەوانەش بۆ ئەوەیە لیستێکی هاوپەیمانی کوردستانی لە کەرکووک بۆ هەڵبژاردنی داهاتووی پەرلەمانی عێراق دروست بکەن. 

 

پەیامنێری رووداو باسی "مەترسییەک" دەکات لە کەرکووک و دەڵێت "عەرەب کە سێ کورسیان لە سنووری حەویجە هەیە رکابەری و ململانێیان لەنێوان خۆیاندا هەیە، بەڵام لەو بازنانەی کە لەگەڵ کورد و تورکمان تێکەڵن هەوڵدەدەن تەنیا یەک بەربژێریان هەبێت بۆ ئەوەی کورسییەک یان دوو کورسی بەدەستبهێنن. بەڵام حیزبە کوردستانییەکان تاوەکو ئێستا یەکدەنگ نین و دەیانەوێت بە تەنیا بەشداری هەڵبژاردن بکەن و بەربژێری خۆیان هەبێت، ئەمەش دەنگی کورد پەرتەوازە دەکات."

 

حیزبە کوردستانییەکان لە هەوڵی تەواودان بۆ پێکهێنانی هاوپەیمانیێتییەک بۆ هەڵبژاردنی داهاتووی پەرلەمانی عێراق. پەیامنێری رووداو ئاماژە بەوەش دەدات "ئەگەر بێت و لە کۆبوونەوەکەی ئەمڕۆ بڕیاربدرێت هەموو حیزبە کورستانییەکان یەک دەنگ بن و پارتی دیموکراتی کوردستانیش بڕیار لەسەر ئەوەبدات بەشداری هاوپەیمانیێتییەکە بکات، ئەوکات کورد کورسی زیاتر لە پەرلەمانی عێراق مسۆگەر دەکات."

 

وا بڕیارە رۆژی 10-10-2021 هەڵبژاردنی پێشوەختەی پەرلەمانی عێراق بەڕێوەبچێت. بەپێی ئامارەکانی کۆمیسیۆنی باڵای هەڵبژاردنەکانی عێراقیش 26 ملیۆن و 642 هەزار کەس مافی دەنگدانیان هەیە.