بڕیاردەری فراکسیۆنی یەکێتی: یاسای هەڵبژاردن مەترسی لەسەر کەرکووک دروستکردووە

 

کاروان یاروەیس، بڕیاردەری فراکسیۆنی یەکێتی لە ئەنجوومەنی نوێنەرانی عێراق لە بەرنامەی رووداوی ئەمڕۆ کە نوێنەر فاتیح پێشکێشی دەکات گوتی: "ئێمە پێمانوایە کە کەرکووک پرسێکی نیشتمانی و نەتەوەییە و پێویستبوو کۆدەنگی کوردی لەسەربێت، بەڵام ئەزموونی تاڵمان لەگەڵ پارتی هەیە لەم بابەتە گرنگانەدا و بەردەوام لە پرسە هەستیارەکاندا بەبێ ئاگەداری لایەنەکانی دیکە پارتی رێککەوتنی حیزبی و سیاسیی دەکات".

 

بەرەبەیانیی رۆژی دووشەممە، دوای گفتوگۆیەکی زۆر، یاسای هەڵبژاردنی پەرلەمان و ئەنجوومەنی پارێزگاکان لە عێراق، دەنگی لەسەر درا و هەموارکرایەوە. بەپێی هەموارەکە دەبێت پێداچوونەوە بە تۆماری دەنگدەرانی کەرکووک بکرێت بە پشتبەستن بە سەرژمێریی ساڵی 1957. 

 

لەبارەی پشتبەستن بەو سەرژمێرییە کە فراکسیۆنی پارتی لە ئەنجوومەنی نوێنەرانی عێراق لە راگەیێندراوێکدا دەڵێت "زامنی دەنگی دەنگدەرانمان لە سنووری شارۆچکەی سەرگەڕان کرد لە رێگەی (بەدەرکردن / استثنا) کردنی ئەو شارۆچکەیە لە سەرژمێری ساڵی 1957، ئەمە جگە لەوەی تەواوی ئەو خێزانانەی بەهۆی سیاسەتی تەعریب لە کەرکووک راگوازرابوون بەپێی مادەی 140 دیسان مافی دەنگدانیان دەبێت."

 

کاروان یاروەیس، بڕیاردەری فراکسیۆنی یەکێتی دەڵێت: لە بەرامبەر ئەو خاڵەدا دوو خاڵی دیکەی مەترسیدار لە یاساکەدا جێگیرکراون، کە لە خاڵێکیاندا نووسراوە "ئەو هاووڵاتییانەی کە دەیسەلمێنن بە فۆڕمی خۆراکی پێش 2003 لە کەرکووک بوون دەتوانن دەنگ بدەن، بەوپێیەش بەشی زۆری عەرەبی هاوردە لە کەرکووک دەنگ دەدەن".

 

رۆژی دووشەممە 27.3.2023 دوای تێپەڕینی یاسای هەڵبژاردن لە ئەنجوومەنی نوێنەرانی عێراق، فراکسیۆنی یەکێتی راگەیێندراوێکی بڵاوکردەوە و لە بەشێکیدا ئاماژەی بەوەدابوو کە "لایه‌نێكی سیاسی بۆ به‌رژه‌وه‌ندی ته‌سكی حزبیان له‌به‌رامبه‌ر دوو كورسی كۆتای مه‌سیحییه‌كان و ده‌نگی ئاواره‌كانی ناو كه‌مپه‌كانی ده‌شتی نه‌ینه‌وا، سازشیان له‌سه‌ر كه‌ركووك كرد". 

 

دوابەدوای ئەوانیش فراکسیۆنی پارتی لە ئەنجوومەنی نوێنەرانی عێراق راگەیێنراوێکی بڵاوکردەوە و لە بەشێکیدا نووسرابوو "تەواوی هەوڵەکانمان خستەگەڕ لەپێناو زامنکردنی مافی دەنگدەرانمان لە هەرێمی کوردستان و کەرکووک و تەواوی ناوچە کوردستانییەکانی دەرەوەی ئیدارەی هەرێمی کوردستان و تەواوی ناوچەکانی عێراق، بەشێوەیەک لە کەرکووک هەموو ئەو رێگرییانەی هەبوون بۆ هەڵبژاردنی ئەنجوومەنی پارێزگا هەڵگیران و بۆ یەکەم جار سەرژمێری ساڵی 1957 دەکرێتە بنەما بۆ هەڵبژاردنی داهاتوو."

 

فراکسیۆنی پارتی بەبێ ئەوەی ناوی یەکێتی بهێنێت، دەڵێت: "ئەوەی جێگەی داخە لایەنێکی سیاسی کە خۆی بەشێک بووە لە دانوستانەکان و دەنگی لەسەر یاساکە داوە و هیچ هەڵوێستێکی فەرمیان لەسەر هیچ بڕگە و مادەیەکی تایبەت بە کەرکووک نەبووە، بەڵام کاتێک گەیشتە ئەوەی لە دواساتەکاندا لە چەند بڕگەیەکی یاساکە کە پەیوەندی نەبوو بە کەرکووکەوە لە بەرژەوەندی گرووپێک درا کە هاوپەیمان و دۆستی ئەوانن و دژی خەڵکی هەرێمی کوردستانن، هەروەها لەپێناو هەندێک بەرژەوەندی و پەیوەندی ژێر بە ژێری حیزبی، ئەو لایەنە سیاسییەی هەرێم دەستیکرد بە بڵاوکردنەوەی راگەیێندراوی چەواشەکارانە و بێ بنەما." 

 

لە بەشێکی دیکەی گوتەکانیدا لە بەرنامەی رووداوی ئەمڕۆ، کاروان یاروەیس، بڕیاردەری فراکسیۆنی یەکێتی لە ئەنجوومەنی نوێنەرانی عێراق گوتی: هەر یاسایەک تەفسیری جیاوازی بۆ کرا واتا کێشەی لێدەکەوێتەوە، ئێستا دۆخێکی نەخوازراو لە کەرکووک هەیە و کەرکووک لە هەموو پارێزگاکانی دیکە زیاتر پێویستی بە پارێزگار و ئەنجوومەنی پارێزگایە، بەڵام ئێستا مەترسی هەیە و نازانرێت بەهۆی یاساکەوە دواتر چی روودەدات.