رووداو دیجیتاڵ
سەرۆکی ئیی پارتی رایگەیاند، بانگەوازەکەی ئۆجەلان بۆ پەکەکە، تەنیا داوایەکە بۆ ئەوەی پەکەکە نووسینگەی خۆی لە باشووری کوردستان بگوازێتەوە بۆ رۆژئاوای کوردستان.
موساڤات دەرویشئۆغڵو، سەرۆکی ئیی پارتی شەوی پێنجشەممە، 28ـی شوباتی 2025، بۆچوونی حیزبەکەی لە بانگەوازی عەبدوڵڵا ئۆجەلان، رێبەری زیندانیکراوی پەکەکە کە تێدا داوای دانانی چەک و هەڵوەشاندنەوەی پەکەکەی کرد، خستەڕوو.
دەرویشئۆغڵو گوتی: "ئەوانەی چاوەڕێی ئەوە دەکەن بەوەی پێیدەگوترێت هەڵوەشاندنەوەی رێکخراوی تیرۆریستی، باوەڕمان بەوە هەبێت کە ئاشتی لە شەڕێکی نەبووەوە دێت، دڵنیابن لەوەی ئەو تاریکیەی ئێمە دەخەنە نێویەوە، هیچ بنێکی نییە".
سەرۆکی ئیی پارتی دەڵێت: "ئەو بانگەوازەی ئۆجەلان بۆ پەکەکە تەنیا داوایەک بوو بۆ ئەوەی پەکەکە نووسینگەی خۆی لە باکووری عێراقەوە بگوازێتەوە بۆ باکووری سووریا".
پەیامەکەی ئۆجەلان هیچ ئاماژەیەکی تێدا نەبوو بۆ هەسەدە و یەپەگە، لە کاتێکدا تورکیا ئەو هێزە بە درێژکراوەی پەکەکە دەزانێت و دەڵێت نابێت لە سووریای نوێ جێگەیان بکرێتەوە.
سەرۆکی ئیی پارتی گوتی: "حکومەت قسەی بۆ ئەمریکا و یەکێتیی ئەوروپا کردووە و گوتویەتی پەیەدە/یەپەگە خودی پەکەکەیە. ئێوە پەکەکە بە رێکخراوێکی تیرۆریستی ناو دەبەن و پشتگیری یەپەگە دەکەن. هەردووکیان هەمان رێکخراون".
رۆژی پێنجشەممە، 27-02-2025، پەیامی ئاشتیی ئۆجەلان لەلایەن ئەحمەد تورک، ئەندامی شاندی ئیمراڵی بە زمانی کوردی خوێندرایەوە. دواتر پەروین بوڵدان، پەرلەمانتاری دەم پارتی لە بازنەی وان پەیامەکەی بە زمانی تورکی خوێندەوە. دەم پارتی وێنەی نامە دەستییەکەی ئۆجەلانی بڵاوکردەوە کە بە زمانی تورکی نووسیبووی.
عەبدوڵڵا ئۆجەلان لە پەیامەکەیدا داوای لە حیزبەکەی کردووە، کۆتایی بە خەباتی چەکداری بهێنن و خۆیان هەڵبوەشێننەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ