4 ئۆتۆمبێل لە رۆژئاوای کوردستان بۆردوومان کران؛ 3 شەڕڤان گیانیان لەدەستدا

 

بۆردوومانەکە ئەمڕۆ چوارشەممە، 28ی شوباتی 2024، بوو. دوو لەو ئۆتۆمبێلانە لە دەروازەی شارەکە، ئۆتۆمبێلێک لە نزیک وێستگەیەکی سووتەمەنی لە شارۆچکەی خانا سەرێ و ئۆتۆمبێلی چوارەمیش لە گوندی وانكێ کرانە ئامانج.

 

تاوەکو ئێستا هێزەکانی سووریای دیموکرات-هەسەدە و ئاسایشی بەڕێوەبەرایەتیی خۆسەری رۆژئاوای کوردستان لەبارەی هێرشەکانی ئەمڕۆوە هیچ راگەێیندراوێکیان بڵاونەکردوەتەوە.

 

ئەنجوومەنی سەربازیی سریان-سۆتۆرۆ کە سەر بە هەسەدەیە لە راگەیێندراوێکدا دەڵێت، هێرشەکان لە رێگەی درۆن و لە لایەن تورکیاوە ئەنجامدراون و لە ئەنجامدا سێ شەڕڤانیان گیانیان لەدەستداوە و دوو شەڕڤانی دیکەش برینداربوون. 

 

میدیای سەر بە بەڕێوەبەرایەتیی خۆسەریش دەڵێت، بەهۆی هێرشەکانەوە ژمارەیەک کەس کوژراون و بریندار بوون.

 

بەگوێرەی زانیارییە بڵاوکراوەکان، لە هێرشەکاندا سێ هاونیشتمانیی سڤیل بە ناوەکانی حەیدەر رۆستەم تەمەن 16 ساڵ، رەشید عومەر تەمەن 49 ساڵ و محەممەدئەمین ئیسماعیل تەمەن 51 ساڵ بریندار بوون و بۆ نەخۆشخانەی دێرک گوێزراونەتەوە.

 

تورکیا دەڵێت، پەیەدە لقی رۆژئاوای کوردستان و سووریای پەکەکەیە. یەپەگەی باڵی چەکداریی پەیەدەش پێکهێنەری سەرەکیی هێزەکانی سووریای دیموکراتە.