ساتی دزیکردنەکە
رووداو دیجیتاڵ
پۆلیسی سلێمانی رایگەیاند، دوای تۆمارکردنی سکاڵا لەلایەن زێڕنگەرێکەوە، مەفرەزەكانی بەشی پۆلیسی نەهێشتنی تاوان - نووسینگەی ناوبازاڕ، سێ ئافرەتی تۆمەتباریان دەستگیرکرد کە زێڕیان دزیبوو.
سەرکەوت ئەحمەد، گوتەبێژی پۆلیسی سلێمانی بە رادیۆی رووداوی راگەیاند، "دوای ئەوەی سێ ئافرەتی بە رەگەز عەرەب دەچن بۆ دووکانێکی زێڕنگەری، خاوەنی دووکانەکە سەرقاڵ دەکەن و یەکێکیان کۆمەڵێک زێڕ دەخاتە جانتاکەیەوە".
گوتەبێژی پۆلیسی سلێمانی ئاماژەی بەوەش دا، دواتر خاوەنی دووکانەکە لە کامێرای چاودێرییەوە بۆی دەردەکەوێت دزیی لێکراوە و دەستبەجێ سکاڵا تۆمار دەکات.
سەرکەوت ئەحمەد گوتیشی، "دوای چاودێریکردنی سێ تۆمەتبارەکە لەلایەن نووسینگەی نەهێشتنی تاوان لە بازاڕ، توانرا ھەرسێکیان دەستگیربکرێن".
بە گوتەی گوتەبێژی پۆلیسی سلێمانی، ئافرەتە دەستگیرکراوەکان عەرەبن و لەدایكبووی ساڵەكانی 1974 و 1997 و 2003ـن، بە بڕیاری دادوەر و بەپێی ماددەی 446 لە یاسای سزادانی عێراقی راگیراون و لێکۆڵینەوەیان لەگەڵ دەکرێت.
سەرکەوت ئەحمەد ئاشکرای دەکات، لە دوو مانگی رابردوودا ئەمە یەکەم حاڵەتی دزیکردنە لەنێو بازاڕی سلێمانیدا تۆمارکرابێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ