وەزیری پێشمەرگە بۆ هاوپەیمانان: گوشار بخەنە سەر عێراق بۆ ئەوەی لیوا هاوبەشەکان ئەرکدار بکات
رووداو دیجیتاڵ
وەزیری پێشمەرگە داوا لە ئەفسەرانی باڵای ئەمریکا و هاوپەیمانان دەکات، گوشار بخەنە سەر عێراق، بۆ ئەوەی ئەرکی دوو لیوا هاوبەشەکەی نێوان پێشمەرگە و سوپای عێراق دیاریبکات و لەناوچە کێشەلەسەرەکاندا بڵاوەیان پێبکەن.
ئه‌مڕۆ دووشەممە 28ی شوباتی 2022 شۆڕش ئیسماعیل، وه‌زیری پێشمه‌رگه‌ی حكومه‌تی هه‌رێمی کوردستان، پێشوازیكرد له جه‌نه‌ڕاڵ فلیپس، گه‌وره راوێژكاری باڵای هێزه‌كانی ئه‌مریكا و كۆلۆنێل دۆگڵاس، به‌رپرسی تیمی هاریكاری ئاسایشی ئه‌مریكا له هه‌رێمی کوردستان و تیمێكی یاوه‌ریان.
بەپێی راگەیێندراوێکی وەزارەتی پێشمەرگە، لەبارەی پرسی رێفۆرمی سه‌ربازی، پێكهێنانی دوو لیوای هاوبه‌شی نێوان پێشمه‌رگه و سوپای عێراق، وه‌زیری پێشمه‌رگه روونیكرده‌وه "له پرۆسه‌ی چاكسازیی هه‌نگاوی باش چووینه‌ته پێشه‌وه و بۆ به‌رده‌وامبوونیشی پێویستمان به‌هاوكاری و هاوئاهەنگی زیاتر و فراوانترە".
لە راگەیێندراوەکەی وەزارەتی پێشمەرگەدا ئاماژە بەوە کراوە: "له‌باره‌ی پێكهێنانی دوو لیوا هاوبه‌شەکە، وه‌زیری پێشمه‌رگه راگه‌یاندووە، له‌لای وه‌زاره‌تی پێشمه‌رگه سه‌رجه‌م رێكاره پێویسته‌كانی ئه‌م لیوا هاوبه‌شانه ته‌واوكراون و ماوه‌ته‌وه سه‌ر وه‌زاره‌تی به‌رگریی عێراق كه كاره‌كانی ته‌واو بكات. بۆ ئه‌مه‌ش داوای له ئه‌فسه‌رانی باڵای ئه‌مریكا و هاوپه‌یمانان كرد، گوشار بخه‌نه سه‌ر عێراق بۆ ته‌واوكردنی كاره‌كان، بۆ ئەوەی ئه‌و لیوایانه بكه‌ونه رۆڵبینین و به‌رپرسیارێتی له ناوچانه‌ی بۆشایی ئه‌منیان هه‌یه له‌نێوان هه‌ردوولا".
رۆژی 25-1-2022، جەبار یاوەر، ئەمینداری گشتیی وەزارەتی پێشمەرگەی هەرێمی کوردستان، بە تۆڕی میدیایی رووداوی گوت: "بڕیاری دروستکردنی دوو لیوای هاوبەش درا، لیوایەکیان سەر بە هەرێمی کوردستان و ئەوی دیکەش سەر بە عێراقە، لیواکەی وەزارەتی پێشمەرگە ئامادەیە و تەنیا ئەوەی ماوە مەشقی هاوبەش لەگەڵ لیواکەی عێراق بکەن".
هەر لیوایەک لە 3500 سەرباز پێکدێت، بەگوتەی جەبار یاوەر، لیواکەی هەرێمی کوردستان بە فەرمی خراوەتە سەر عێراق و نووسراو ئاراستەی مستەفا کازمی فەرماندەی هێزە چەکدارەکانی عێراق کراوە و ئەویش رەزامەندی دەربڕیوە.
سەبارەت بە خەرجنەکردنی مووچەی پێشمەرگەکانی لیوای 20، ئەمینداری وەزارەتی پێشمەرگە گوتی: "ساڵی رابردوو وەزیری دارایی عێراق گوتبووی بودجەم لەبەردەست نییە بۆ ئەو دوو لیوایە، چونکە دەبێت مووچە و هەموو کەرەستە پێویستییەکانیان لەلایەن عێراقەوە دابینبکرێت، ئێستاش ئێمە چاوەڕوانی وەزارەتەکانی دارایی و بەرگریی عێراقین، بۆ ئەوەی بەتەوایی لیواکە بگوازرێنەوە سەر عێراق".
لیواکەی هەرێمی کوردستان لە بنکەکانی وەزارەتی پێشمەرگە مەشقیان پێکراوە، ئەوەی ماوەتەوە دەبێت دوای تێکەڵبوونیان لەگەڵ لیواکەی سوپای عێراقدا، لە ناوچەکانی سوپای عێراق مەشقی هاوبەش وەربگرن و دواتر دابەشی ئەو شوێنانە بکرێن کە بۆشایی ئەمنی ناودەبرێن.
نزیکەی 560 کیلۆمەتر بۆشایی ئەمنیی لەنێوان هێزەکانی پێشمەرگە و سوپای عێراقدا هەیە، کە زۆرینەی دوای رووداوەکانی 16ی ئۆکتۆبەری ساڵی 2017 دروستبوون و بەهۆکاری سەرەکیی هێرشە ناوبەناوەکانی چەکدارانی داعش دادەنرێن بۆ سەر هێزەکانی پێشمەرگە و سوپای عێراق.
کۆتایی ساڵی رابردوو، هێزەکانی پێشمەرگە و سوپای عێراق چەند ئۆپەراسیۆنێکی هاوبەشیان لەو ناوچانە کرد، دواتر گەڕانەوە سنوورەکانی خۆیان، بەوەش تاوەکو ئێستا ئەو بۆشاییانە پڕنەکراونەتەوە، بەڵام وەک جەبار یاوەر گوتی: "هەموو ئەو یەکانەی پێشمەرگە و سوپای عێراق لە ناوچەی بۆشاییە ئەمنییەکاندا نزیکی یەکن، دەسەڵاتی ئەوەیان پێدراوە کەی بیانەوێت ئۆپەراسیۆنی هاوبەش بکەن و بەردەوام ئۆپەراسیۆنی هاوبەشیش دەکرێت".