هەڵەیەک روویدا! دووبارە هەوڵبدە
رووداو دیجیتاڵ
گوتەبێژی وەزارەتی ئەوقافی هەرێمی کوردستان دەڵێت، پار 91 مامۆستا لە حوجرەکانی وەزارەتی ئەوقاف مۆڵەتیان پێدراوە و بوون بە مامۆستای ئایینی.
رۆژی سێشەممە، 28ـی کانوونی دووەمی 2025، نەبەز ئیسماعیل، گوتەبێژی وەزارەتی ئەوقاف و کاروباری ئایینیی هەرێمی کوردستان بە تۆڕی میدیایی رووداوی راگەیاند: "ئەو مامۆستایانە لە حوجرەکان مۆڵەتی زانستی وەردەگرن، بەڵام مەرجە ئەم حوجرەیە سەر بە وەزارەتی ئەوقاف و کاروباری ئایینی بێت و لە چوارچێوەی مۆڵەتە فەرمییەکانی وەزارەتی ئەوقاف بێت."
لەبارەی ئەو کەسانەی کە مۆڵەت بەم مامۆستایانە دەدەن، گوتەبێژی وەزارەتی ئەوقاف گوتی، "پێویستە مامۆستای ناسراو و خاوەن ئەزموون بن و تەمەنێکیان بەڕێکردبێت لە خزمەتکردن. لەلایەن وەزارەتی ئەوقافەوە دەسەڵاتی ئەوەیان پێدرابێت مۆڵەت بدەن."
یەکێک لە مەرجەکانی مۆڵەت وەرگرتنی مامۆستایانی ئایینی ئەوەیە کە 6 بۆ 8 ساڵ بخوێنن. نەبەز ئیسماعیل دەڵێت: "لە ماوەی ئەو ساڵانەدا هەموو زانیارییە شەرعییەکان وەردەگرن، دوای ئەوەی لە زانیارییە شەرعییەکان سەرکەوتوبوون، ئەوکات مۆڵەتیان پێدەدرێت و دەبن بە پێشنوێژ و وتارخوێن."
لە پارێزگاکانی سلێمانی و هەڵەبجە زۆرترین مامۆستا مۆڵەتیان وەرگرتووە کە 41 کەس بوون. گوتەبێژی وەزارەتی ئەوقاف گوتی: "لە پارێزگای هەولێر 30 مۆڵەت و دهۆکیش 20 مۆڵەت دراوە."
لە ھەرێمی کوردستان شەش هەزار و 102 مزگەوت هەن، 3800یان گوتاری ھەینییان تێدا دەخوێندرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ