لە سەقز کۆڵبەرێک بە تەقەی هێزە ئەمنییەکان کوژرا
رووداو دیجیتاڵ
لە ناوچە سنوورییەکانی شاری سەقز، هێزە سەربازییەکانی ئێران تەقەیان لە ژمارەیەک کۆڵبەر کرد و یەکێکیان گیانی لەدەستدا. کۆڵبەرێکی دیکەش لە ناوچەی نەوسوود بریندار بووە.
رووداوەکە ئێوارەی رۆژی شەممە، 27.01.2024 روویداوە. هێزە سەربازییەکانی ئێران لە سنووری بەستامی سەر بە شاری سەقز، تەقەیان لە کۆڵبەرەکان کردووە. بەو هۆیەوە کۆڵبەرێک بە ناوی مەنسوور محەممەدنەژاد گیانی لەدەستداوە.
مەنسوور محەممەدنەژاد خەڵکی گوندی جونیانی سەر بە شاری سەقز بوو و تەمەنی 45 ساڵ بوو.
هەروەها شەوی رابردوو لە ناوچە سنوورییەکانی شارۆچکەی نەوسوودی سەر بە پارێزگای کرماشان، هێزەکانی پاسەوانی سنووری ئێران تەقەیان لە کۆڵبەران کردووە و کۆڵبەرێک بە ناوی پەیمان محەممەدی برینداربووە.
بەپێی راپۆرتی تۆڕی مافی کوردستان لە ساڵی 2023دا لانیکەم 29 کۆڵبەر لە پارێزگاکانی سنە، کرماشان و ورمێ بە هۆکاری جیاواز گیانیان لەدەستداوە و 228 کۆڵبەریش بریندار بوون.
کۆڵبەرەکان دەڵێن، بەهۆی نەبوونی هەلی کار و ناچاربوون بۆ دابینکردنی بژێویی ژیان روو لە ناوچە سنوورییەکان دەکەن و لە بەرامبەر بڕە پارەیەکدا کەلوپەلی بازرگانەکان دەگوازنەوە.
لە ساڵانی پێشتردا تەنیا خەڵکی ناوچە سنوورییەکان کۆڵبەرییان دەکرد، بەڵام لەم چەند ساڵەدا کە بارودۆخی ئابووری خراپتر بووە، لە شارە دوورترەکانی سنووریشەوە خەڵک بۆ دابینکردنی بژێویی ژیان، روو لە ناوچە سنوورییەکان دەکەن.