فەرمانگەى ژینگەپارێزی هەولێر لەبارەی رووداوی شێڵتەری سەگەکان: پارێزگار لێکۆڵینەوە لە بابەتەکە دەکات

 

 

رۆژی سێشەممە، 26ـی کانوونی یەکەمی 2023، ئێریکا-ی هەڵگری وڵاتینامەی ئەمریکا و رووسیا، کە لە ساڵی 2017ـەوە لە کوردستان دەژی و سەرباری کاری تایبەتی خۆی، خۆبەخشانە یارمەتیی ئاژەڵان دەدات، بە تۆڕی میدیایی رووداو راگەیاند، "لە کاتی سەردانی شێڵتەری سەگە بێلانەکانی هەولێر، لەلایەن ستافی شێڵتەرەکە بە دار راونراوە و بەشێوازێکی نەشیاو مامەڵەی لەگەڵدا کراوە و رێگری لێکراوە ئەرکەکەی بەجێ بگەیێنێت." 

 

لە بەرامبەردا، بەڕێوەبەرایەتیی فەرمانگەى خزمەتگوزارى ژینگەپارێزى هەولێر روونکردنەوەیەکی لەبارەی رووداوەکە بڵاوکردەوە و ئەوەی خستووەتەڕوو، کە چەند رۆژیک لەمەوبەر ژنێکی بیانی، سەردانی کردن و ئامادەیی خۆی دەربڕیوە لەگەڵ تیمێکی خۆبەخش بە دابینکردنی دەرمان، هاوکاری شێڵتەرى سەگى بێلانەى هەولێر بکات، ئەوانیش وێڕای سوپاس و پێزانین، داواکەیان پەسندکردووە. 

 

بەڕێوەبەرایەتییەکە دەشڵێت، "رۆژی سێشەممە داوای چوونە ژورەوەی شێڵتەرى کرد و رەزامەندی پێدرا و بڕیاربوو بڕێک دەرمان ببات وەک یارمەتى بۆ شێڵتەر، بەڵام بەداخەوە لەکاتی چوونە ژوورەوەیدا بەچەند وشەیەکی نەشیاو بێڕێزی زۆری بەرامبەر بە ستافی شێڵتەر و پزیشکانى ڤێتێرنەری کردووە کە تەمەنێکی زۆریان لەم بوارەدا هەیە". 

 

هەروەها باس لەوە کراوە، "خانمە بیانییەکە و هاوکارانی لەناو شێڵتەرەکەدا هەندێک بابەتیان وروژاندووە کە پەیوەندی بە ئەوانەوە نییە، وەک رەخنەگرتن لەوەی بۆچی خواردن و ئاو لەناو خانەی ئاژەڵەکان نییە، بێئاگا لەوەى بە پێی رێنمایی ڤێتەرنەری ئەو ئاژەڵەی نەشتەرگەری بۆ دەکرێت، تا ماوەیەک نابێ ئاو و خواردنی پێبدرێت. سەربارى ئەوەش هەوڵی وێنەگرتنیانداوە لە کاتێکدا پێشوەختە پێیان راگەیێندراوە کە وێنەگرتن قەدەخەیە، بۆیە لەلایەن تیمەکانمانەوە رێگرییان لێکراوە تاوەکو کێشە و گرفتی زیاتر بۆ شێڵتەرەکە دروست نەکەن." 

 

ئێریکا بە رووداوی گوت، "ئەمڕۆ دووەمجار بوو سەردانی شێڵتەرەکە بکەم. ئەمجارە بڕیارمدا پزیشک لەگەڵ خۆمدا ببەم بۆ ئەوەی چارەسەری سەگەکان بکەن، بەڵام دۆخەکە زۆر خراپ بوو، ئەوان رێگەیان نەدا چارەسەرییەکە بکەین، تەنیا ویستیان دەرمانەکان وەربگرن و زۆر بە خراپی مامەڵەیان لەگەڵ ئێمەدا کرد. ئەم شێڵتەرە وەکو دۆزەخ وایە؛ چوار هەزار و 200 سەگی تێدایە و لە دۆخێکی خراپدان."

 

 

بەڕێوەبەرایەتییەکە روونی دەکاتەوە کە شێڵتەری سەگى بێلانەى هەولێر لەسەر ئاستی عێراق و هەرێمى کوردستان، بە تەواوی مەرجە تەندروستی و ژینگەییەکان تێدایە و ئاژەڵەکان بەپێی رێکارە تەندروستییەکان مامەڵەیان لەگەڵ دەکرێت، "بۆ ئەو رووداوەى ئەمڕۆش روویدا پارێزگای هەولێر لێکۆڵینەوە لە بابەتەکە دەکات و رێکارى یاسایی بەرامبەر ئەو کەس و لایەنانە دەگیرێتەبەر کە کەمتەرخەم بوونە و کاری نەشیاو و رەفتارى نابەجێیان ئەنجامداوە."

 

تیمی ئاژەڵپارێزانی کوردستان لە دۆخی شێڵتەری سەگەگانی هەولێر ناڕازین و دەڵێن، "شوێنیان گونجاو نییە و رۆژانە ژمارەیەکی زۆر سەگ لە شێڵتەرەکەدا مردار دەبن."

 

فەرمان فازڵ، سەرۆکی رێکخراوی ئاژەڵدۆستان بە رووداوی گوت، "حکومەت ناتوانێت ئەو هەموو خواردنە بۆ ئەو هەموو ئاژەڵە دابین بکات. لەکاتێکدا سەگەکەتان نەزۆک کردووە، بیگەڕێننەوە سەر شەقام، چونکە ئیدی بە کەس ناوەڕن. بەڵام نازانین بۆ لەوێن."

 

نزیکەی ساڵێکە ئەم شێڵتەرە لە هەولێر بۆ کۆکردنەوەی سەگی بێلانە لەسەر رووبەری 50 هەزار مەتر دووجا دروستکراوە و دەکەوێتە سەر رێگەی هەولێر - گوێڕ. بەشێک لەو سەگانەی کۆکراونەتەوە، نەزۆک دەکرێن، بەڵام لەلایەن ئاژەڵدۆستانەوە گلەیی زۆر لەسەر شێوازی راگرتنی سەگەکان دەکرێت.