تورکیا و پەکەکە نوێترین ئاماری شەڕی نێوانیان بڵاودەکەنەوە

 

 

ئەمڕۆ هەینی 27ـی ئەیلوولی 2024، وەزارەتی بەرگریی تورکیا لە هەژماری تایبەتی خۆی لە تۆڕی کۆمەڵایەتیی ئێکس، گیانلەدەستدانی 21 گەریلای پەکەکەی لە هەرێمی کوردستان راگەیاند و ئاماژەی بەوەش کرد، سوپای تورکیا لە ئەنجامدانی ئۆپەراسیۆنەکانی لەودیو سنوور بەردەوامە، ئەوەش "لەپێناو ئاسایشی سنوورەکان و دەستەبەرکردنی ئارامی و ئاسایشی".

 

وەزارەتی بەرگریی تورکیا لە راگەیێندراوەکەدا باس لەوە دەکات، ئەو گەریلایانە لە چیاکانی گارە و ئاسۆس لە هەرێمی کوردستان گیانیان لەدەستداوە. 

 

رۆژی 26ـی مانگ، ناوەندی چاپەمەنی و راگەیاندنی هەپەگە بڵاویکردەوە، لە 24 کاژێری رابردووی پێش ئەو رێککەوتەدا هێرشێکیان کردووەتە سەر هێزەکانی تورکیا لە ناوچەی زاپ و بەو هۆیەوە سەربازێک کوژراوە. 

 

هەپەگە ئاماژەی بەوەشکرد، دوو درۆنی هێزەکانی تورکیایان لە ناوچەکانی مەتین، زاپ و خواکوڕک لە هەرێمی کوردستان خستووەتە خوارەوە. 

 

ئەم شەڕ و پێکدادانە لە چوارچێوەی ئۆپەراسیۆنێکدایە کە تورکیا ناوی ناوە چنگ-قوفڵ و لە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکردووە.