رووداو دیجیتاڵ
بە بڕیاری مەسرور بارزانی، سەرۆکوەزیرانی هەرێمی کوردستان 700 پارچە زەوی بۆ مامۆستایانی زانکۆی سلێمانی تەرخانکران و بڕیاری تاپۆکردنیشیان درا.
هەڤاڵ ئەبوبەکر، پارێزگاری سلێمانی دەقی بڕیارەکەی لە فەیسبووکی خۆی بڵاوکردووەتەوە و دەڵێت "دوای هەوڵە بەردەوامەکانمان لە هەموو قۆناخ و دۆخ و داخوازییە یاسایی و کاگێڕیی و تەکنیکییەکاندا، بۆ تەرخانکردن و تاپۆکردنی 700 پارچە زەوی بۆ مامۆستایانی زانکۆی سلێمانی، بڕیاری تاپۆکردنی زەوییەکان لەلایەن بەڕێز سەرۆکی ئەنجوومەنی وەزیرانەوە درا".
پارێزگاری سلێمانی پیرۆزبایی لە مامۆستایانی زانکۆی سلێمانی دەکات و ئاماژە بەوەش دەدات "شاناز و ئاسودەین کە توانیمان داکۆکیکارێکی راستگۆ و دڵسۆزبین لەم دۆسییەداو بە هیممەتی هەموو لایەک رێکارەکان تەواوبکەین و بودجەی جیاکردنەوەی زەوییەکانیش وەک پارێزگاری سلێمانی بگرینە ئەستۆ."
بەپێی ئەو بڕیارەی کە واژۆی مەسرور بارزانی، سەرۆکوەزیرانی هەرێمی کوردستانی لەسەرە، دابەشکردن و تاپۆکردنی پارچە زەوییەکان بە ناوی (دڵسۆز جەعفەر حسێن) دەستپێدەکات و بە (نامیق حەمەعەلی حەمەسەعید) کۆتایی دێت.
وەک لە فەرمانەکەدا هاتووە، تاپۆکردنی ئەو 700 پارچە زەویە لە کۆی زەوی پرۆژەی وەبەرهێنانەکە کارەکانی جیاکردنەوەی زەوی یەکەی نیشتەجێبوونی بۆ جێبەجێکراوە و بەناوی ئەو مامۆستایانەی کە لە پرۆژەی ئاماژەپێکراودا ناویان تۆمارکراوە. بەمەرجێک پێشتر لە وەرگرتنی زەوی و یەکەی نیشتەجێبوون سوودمەند نەبووبن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ