بەڕێوەبەرایەتیی پاسپۆرتی سلێمانی دەوامی فەرمانبەرانی کەمکردەوە

 

 

بەڕێوەبەرایەتیی پاسپۆرتی سلێمانی لە راگەیێندراوێکدا کە ئەمڕۆ سێشەممە، 27ـی ئابی 2024 بڵاویکردووەتەوە، دەڵێ: "دەوامی بەڕێوەبەرایەتیمان رۆژانە لە یەکشەممە تاوەکو پێنچشەممە، لە کاژێر 8:30ـی بەیانی بۆ کاژێر 2:00ی پاشنیوەڕۆ دەبێت."

 

دەشڵێت: "پێویستە سەرجەم هاووڵاتییان پێش کاژێر 12:00ـی نیوەڕۆ سەردانمان بکەن تاوەکو فریای تەواوکردنی مامەڵەکانیان بکەون."

 

نەقیب بەیان جەمال، بەڕێوەبەری راگەیاندنی پاسپۆرتی سلێمانی، بە تۆڕی میدیایی رووداوی راگەیاند: "پێشتر رۆژانە تاوەکو کاژێر 4:00ـی پاشنیوەڕۆ و دواتریش دەواممان دەکرد، بەڵام ئێستا ژمارەی ئەو کەسانەی سەردانمان دەکەن کەمبووەتەوە."

 

ئاماژەی بەوەشکرد، پێشتر رۆژانە نزیکەی هەزار و 200 مامەڵەیان لە دەرهێنان و وەرگرتنەوەی پاسپۆرت جێبەجێکردووە، بەڵام ئێستا بۆ نزیکەی 900 کەمبووەتەوە.