سەرۆکی ئەنجوومەنی سەربازیی دێرەزوور لەلایەن هەسەدەوە دەستگیر کرا
رووداو دیجیتاڵ
بەپێی ئەو زانیارییانەی کە لە سەرچاوەیەکی خۆجێی رۆژئاوای کوردستانەوە دەست تۆڕی میدیایی رووداو کەوتوون، ئەبوو خەولە، سەرۆکی ئەنجوومەنی سەربازیی دێرەزوور لەلایەن هێزەکانی سووریای دیموکرات (هەسەدە)ەوە دەستگیر کرا.
بەپێی ئەو زانیارییانەی کە لە رۆژئاوای کوردستانەوە دەست رووداو کەوتوون، رۆژی یەکشەممە 27ـی ئابی 2023، ئەبوو خەولە، سەرۆکی ئەنجوومەنی سەربازیی دێرەزوور لەلایەن هێزەکانی سووریای دیموکرات (هەسەدە)ەوە دەستگیر کرا. دەستگیرکردنی ئەبوو خەولە، سەرۆکی ئەنجوومەنی سەربازیی دێرەزوور لەلایەن هەسەدەوە بە پشتگیری هێزەکانی ئەمریکا بووە.
لەبارەی دەستگیرکردنی ئەو فەرماندەیە و هۆکارەکەی، هێزەکانی سووریای دیموکرات تائێستا هیچ روونکردنەیەکیان بڵاونەکردووەتەوە.
دوای دەستگیرکردنی سەرۆکی ئەنجوومەنی سەربازیی دێرەزوور، میدیای سەر بەو فەرماندەیەش لەلایەن هێزەکانی ئاسایشی سەر بە بەڕێوەبەرایەتیی خۆسەرەوە داخراوە و بەپێی زانیارییەکان، بەڕێوەبەری ئۆفیسی هەمان میدیا لە شاری حەسەکە، ئەحمەد ئەلعەجوور و ژمارەیەک رۆژنامەڤانیش دەستگیر کراون.