تورکیا بۆردوومانکردنی 25 پێگەی پەکەکەی راگەیاند و هەپەگە دەڵێ زیانی گیانیی نەبووە

 

بەگوێرەی راگەیێندراوەکە کە رۆژی 26ـی تەممووزی 2024 بڵاوکراوەتەوە، فڕۆکە جەنگییەکانی فەرماندەیی هێزەکانی ئاسمانی بە هاوئاهەنگی میت، 25 پێگەی پەکەکەیان لە حەشارگە، ئەشکەوت، کۆگا و پەناگە لە خاکی هەرێمی کوردستان بۆردوومان کردووە.

 

لە راگەیێندراوەکەدا ئەوەش خراوەتەڕوو؛ بەمەبەستی لەنێوبردنی ئەندامانی پەکەکە، تێکشکاندنی ئەو هێرش و هەڕەشانەی لە باکووری عێراقەوە دەکرێنە سەر هێزە ئەمنی و خەڵکەکانیان و بۆ پاراستنی سنوورەکانیان؛ ئۆپەراسیۆنە ئاسمانییەکان لە ناوچەکانی مەتین، گارە، خواکوڕک، قەندیل و ئاسۆس ئەنجامدران. 

 

دوای بڵاوبوونەوەی راگەیێندراوەکەی وەزارەتی بەرگریی تورکیا، ناوەندی چاپەمەنی و راگەیاندنی هێزەکانی پاراستنی گەل (هەپەگە) کە باڵی سەربازیی پەکەکەیە، راگەیێندراوێکی بۆ رای گشتیی بڵاوکردەوە و جەخت لەوە دەکاتەوە، لە بۆردوومانەکەدا زیانی گیانییان نەبووە. 

 

رۆژی 21ـی مانگ، هەپەگە رایگەیاند، لە سنووری قەزای ئامێدی لە پارێزگای دهۆک شەڕ لەنێوان گەریلاکان و سەربازانی سوپای تورکیا روویداوە و، لە ئەنجامدا 4 سەرباز کوژراون و سەربازێکی دیکەش برینداربووە.

 

ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.