لە کەرکووک تەقە لە بارەگای لقی 3ی پارتی کرا
رووداو - کەرکووک
بەرەبەیانی ئەمڕۆ شەممە کاژێر 03:00 تەقە لە بارەگای لقی 3ی پارتی دیموکراتی کوردستان کرا، کە دەکەوێتە پشت بازاڕی ئەحمەد ئاغا و "هیچ زیانێکی نەبووە."
ئارام جەباری، کارگێڕی لقی 3ی پارتی دیموکراتی کوردستان بە تۆڕی میدیایی رووداوی راگەیاند، "لە ئاراستەی پشتی بارەگای لقی 3وە دەستڕێژی گولـلە لە بارەگاکەمان کراوە، پاسەوانەکانی بارەگا دەستبەجێ وەڵامیان داوەتەوە و هیچ زیانێکی نەبووە."
بە گوتەی کارگێڕی لقی 3ی پارتی، "تەقەکەرەکان پیادە بوون و دوای تەقەکردن لە بارەگای لقی 3 هەڵاتوون. دوای رووداوەکەش هێزێکی ئەمنیی هاتن بۆئەوەی لێکۆڵینەوە لە رووداوەکە بکەن و وردبینی لە کامێراکانی چاودێری دەکەن."
لە سەرەتای مانگی 12ی ساڵی رابردوو، دوای شەش ساڵ دابڕان لە کەرکووک، پارتی بارەگای لقی 3ی وەرگرتەوە و کاری رێکخستنی تێدا دەکات.