وەزارەتی دارایی وەڵامی میوانێکی بەرنامەی لەگەڵ رەنج دەداتەوە

 

بەڕێوبەرایەتی گشتی ژمێرکاریی وەزارەتی دارایی و ئابووری هەرێمی کوردستان لە روونکردنەوەیەکدا وەڵامی قسەکانی د. دیار ئیبراهیم، بەڕێوەبەری گشتیی تەندروستیی ئیدارەی راپەڕین دەداتەوە کە شەوی 20ـی ئەم مانگە لە بەرنانەی لەگەڵ رەنج-ی تۆڕی میدیایی رووداو کردی.

 

لە روونکردنەوەکەدا بەڕێوەبەرایەتییەکەی ئەو وەزارەتە لەبارەی کڕینی پێداویستیی پزیشکی و تاقیگەیی و ئامێری پزیشکی بۆ بەڕێوەبەرایەتی گشتیی تەندروستیی راپەڕین دەڵێت: لە رۆژی 14ـی نیسان، نووسراو کراوە و لە 23ـی نیسان گەیشتووەتە وەزارەتەکەیان.

 

دەشڵێت، رۆژێک دوای گەیشتنی، نووسراوەکە نێردراوەتە لیژنەی هەڵسەنگاندنی نرخ، رۆژی 30ـی نیسان لە لیژنەکەوە نێردراوەتە بەڕێوەبەرایەتی خەرجییەکان و وردبینی بۆ کراوە، هەمان رۆژ پەسەنەدکراوی رەوانەی بەڕێوەبەرایەتی خەرجییەکان کراوە. رۆژی دووی ئایاریش بە پەسەندکراوی ئاڕاستەی بەڕێوەبەری گشتیی ژمێرکاری پەسەندیکردووە و رۆژی 6ـی ئەم مانگە وەزیری دارایی ئاڕاستەی سەرۆکایەتی ئەنجوومەنی وەزیرانی کردووە و بۆ وەزارەتی دارایی نەگەڕاوەتەوە.

 

بەڕێوەبەرایەتییەکە لە روونکردنەوەکەدا دەڵێت: هیچ کەمتەرخەمییەک لەلایەن ئەوانەوە بۆ دواکەوتنی دۆسییەکە نەبووە؛ "هۆکارەکە خودی وەزارەتی تەندروستییە کە درەنگ و لە کۆتایی مانگی نیسان نووسراوی ئاڕاستەی وەزارەتی دارایی کردووە."

 

لە بەرنامەکەدا د. دیار ئیبراهیم، بەڕێوەبەری گشتیی تەندروستیی ‏راپەڕین ‌و ‏ئەندامی ‏‏‏ئەنجوومەنی ‏وەزارەتی تەندروستی لە بەشێكی قسەكانی ‏باسی لەوە كرد، بۆ ‏چاکكردنی سەربانی ‏نەخۆشخانەی قەڵادزێ‌ كە ‏دڵۆپە دەكات، داوای بڕێك ‏پارەیان لە وەزارەتی دارایی ‏كردووە؛ "‏وەڵامی وەزارەتی دارایی لە نوكتەیەك ‏چووە، چونكە ‏پێیان راگەیاندوون 80% دڵۆپەكانی ‏سەربانەكە ‏ببڕن با 20% بمێنێ، ئاشكرایە ‏وەزارەتی دارایی بۆ ‏پرۆژەكانمان ‏پارە خەرج ناكات، تاوەكو ئێستا رەزامەندی كڕینی ‏‏دەرمانی ساڵی 2024 ‏‏مان بۆ نەهاتووە." 

 

وەزارەتی دارایی لە روونکردنەوەکەیدا، لەبارەی ئەو قسەیەوە دەڵێت: "سەبارەت بە چارەسەرکردنی کێشەی سەربان لە نەخۆشخانەی فێرکاریی شەهیدانی قەڵادزێ، بە نووسراویان ژمارە ( 11652 لە 3-9-2019 ) داوای خەرجکردنی بڕی (3,662,500 ) دیناریان کردووە، بەڕێوبەرایەتی ئەندازە بەپێی دەرخستەی هاوپێچ و بەپێی نرخی بازاڕ، بڕی پارەی داواکراوی داشکاندووە بۆ بڕی ( 23,420,000) دینار، وەک قۆناخی یەکەمی پرۆژەکە رێژەی  20٪ـی دراوەتێ بەپێی رێنماییە داراییەکان بەبڕی (4,684,000) دینار.

 

دەشڵێت، دواتر بە نووسراویان ژمارە ( 1592 لە 20-2-2022 ) وەکو قۆناخی دووەم و کۆتایی پرۆژەکە رێژەی 80٪ـی  پارەکەی پێدراوە بە بڕی (18,736,000) دینار  واتە رێژەی  100٪ پارەکەی وەرگرتووە، "جێی سەرسوڕمانە ئەو بەڕێزە بەڕێوەبەری گشتیی تەندروستی ئیدارەیەکی سەربەخۆیە و بەبێ هیچ زانیاری و شارەزاییەک لە رێنمایی دارایی و ژمێریاری بکەوێتە بەخشینەوەی تۆمەت بۆ وەزارەت و بەڕێوبەرایەتییە گشتییەکانمان ."

 

هەروەها ئاشکراشی دەکات: "ئێستا نووسراوێکی دیکەیان بە ژمارە ئۆنلاینی (26881) بە بڕی (31,200,000 ) دینار بۆ جاری دووەم لەماوەی کەمتر لە سێ ساڵ بۆ هەمان مەبەست کردووە، واتە چارەسەرکردنی کێشەی هەمان سەربان لە نەخۆشخانەی فێرکاری شەهیدانی قەڵادزێ و لە بەڕێوبەرایەتی گشتیی ژمێرکاری کاری لەسەر دەکرێت."

 

رەخساندنی دەرفەتی كار بۆ دەرچووانی بەشە ‏تەندروستییەكان، ناونیشانی بەرنامەی 19ـی ئەم مانگەی لەگەڵ رەنج بوو. چارەنووسی خۆبەخشانی تەندروستی ‌و كەی دادەمەزرێن؟ سیستەمی تەندروستی ‏كوردستان، خراپی بینای نەخۆشخانەكان، ژمارەی پەرستاران كەمە یان زیادە؟ ‏ئاستی زانستی پەرستاران. ئەمانە ئەو مژارانەبوون كە لەم بەرنامەیەدا گفتوگۆیان ‏لەبارەوە كرا.‏ ‏