چیرۆکی دایکێک کە کوڕێکی بە مین گیانی لەدەستداوە و کوڕێکیشی خۆی خنکاندووە
رووداو دیجیتاڵ
گوندی سنووریی شێخ سڵه له رۆژئاوای پارێزگای کرماشان خاوه‌نی چه‌ندین قوربانیی مینه، به‌ڵام ئه‌وه‌ی که ته‌قینه‌وه‌ی مین به سه‌ر بنه‌ماڵه‌که‌ی پیرۆزیدا هێنا، دڵهه‌ژێنترین کاره‌ساته له‌و ناوچه‌یه.
پیرۆز پاش له ده‌ستدانی هاوژینه‌که‌ی ئه‌رکی خێزانه شه‌ش که‌سییه‌که‌ی که‌وته ئەستۆ، کوڕ و کچێکی ئیفلیج ده‌بن، به‌ڵام یه‌کێک له کوڕه ئیفلیجه‌کانی خۆی ده‌کوژێت، ئه‌وه کۆتایی خه‌مه‌کانی پیرۆز نییه و پاش دوو ساڵ له خۆکوشتنی کوڕه 30 ساڵانه‌که‌ی، ته‌قینه‌وه‌ی مینێک له حه‌وشه‌ی ماڵه‌که‌ی ئازاره‌کانی ده‌گه‌یێنێتە لووتکه.
پیرۆز یوسفی تەمەنی 65 ساڵانە و ئێستا پرچه سپییه‌کانی و ده‌موچاوی تێکشکاوی چیرۆکی پڕ مەینەتیی ژیانی دەگێڕنەوە، ئەو بە رووداوی گوت، "من خاوه‌نی سێ کوڕ و سێ کچ بووم، هاوژینەکەم 12 ساڵ پێش ئێستا گیانی لەده‌ستدا، کچێک و کوڕێکم پاش ئه‌وه‌ی گه‌یشتنه ته‌مه‌نی حه‌ڤده ساڵان تووشی ئیفلیجیی بوون و له جێگەدا که‌وتن."
یەکێک لە کوڕە ئیفلیجه‌که‌ی ساڵی 2015 به زه‌حمه‌ت خۆی له ماڵ ده‌خزێنێته ده‌ره‌وه و ئه‌ڕواته ده‌ره‌وه‌ی گوندەکەیان، به حەبل خۆی بە دارێکدا هه‌ڵده‌واسێت و کۆتایی به ژیانی خۆی ده‌هێنێت.
پیرۆز لەوبارەیەوە بە رووداوی گوت، کوڕەکەی تەمەنی نزیکەی 13 ساڵان بوو، که تووشی ئیفلیجی بوو، "زۆر بێتاقه‌ت بوو، ته‌مه‌نی ببووه 30 ساڵان، خۆم هه‌موو کاره‌کانیم دەکرد، به‌ڵام نیوه‌ڕۆیه‌کیان سه‌یری ژوورەکەیم کرد نه‌مابوو، پێشتر به زه‌حمه‌ت خۆی ده‌گەیاندە به‌ر ده‌رگە و له‌وێ داده‌نیشت، به‌ڵام سەیری ئەوێشم کرد نه‌بوو، ئیدی تاوەکو ئێواره هه‌موو شوێنێک گه‌ڕاین، نزیک شه‌و بوو ته‌رمه‌کەیان له سه‌ره‌وه‌ی گونده‌کە دۆزییەوە کە لەوێ خۆی خنکاندبوو".
ئەو دایکە ئاماژە بەوە دەکات، دوای ئەوەی بەسەری هات، 'تەنیا دڵخۆشیی' جەلیلی کوڕی بووە کە کوڕە بچووکیشی بوو، ئەو کاسبکاری ماڵەکەیان بوو، لەسەر سنوور کاری کردووە و یارمەتیی خێزانەکەی داوە. دەڵێت، "ئەوکاتە کێشەیەکی ئەوتۆمان نەمابوو."
پیرۆز چاوه قووڵه‌کانی فرمێسکی تێ دەزێت و درێژه بە قسەکانی دەدات، باس لە رۆژێکی کارەساتبار بۆ خێزانەکی دەکات، دەڵێت، رۆژی4-6-2018 بوو، کاتێک خه‌ریک بووین له‌ولای ماڵی خۆمانه‌وه خانوویێک ساز بکه‌ین، جه‌لیل له‌نێو خاکه‌که‌دا شتێکی دۆزییه‌وه، نه‌مانده‌زانی چییه، هێنایه‌وه له حه‌وشه‌دا دانیشتبوو هه‌ر خه‌ریکی بوو، قوڕ و خۆڵێکی زۆر دایپۆشی بوو، جه‌لیل بەنیاز بوو لێی بکاته‌وه کوڕ و کچێکی دیکەیشم ده‌وره‌یان لێ دابوو. منیش تۆزێک لێیان دورتر بووم، هه‌ر دەمگوت ده‌ستکاریی مه‌که، نەوەک مه‌ترسیدار بێت."
وەک دایکی جەلیل دەیگێڕێتەوە، کوڕەکەی پێی گوتووە، "هیچ نییه مه‌ترسه"، پاشان دایکی ویستوویەتی بچێتە ماڵەوە نانیان بۆ بێنێت، بەڵام دەڵێت "ده‌نگێکی سامناک رایچه‌ڵه‌کاندم، ئاوڕم دایه‌وه، بینیم منداڵەکانم شه‌ڵاڵی خوێن بوونه و که‌وتوون، ته‌پوتۆزێکی زۆر هه‌ستابوو، منیش بێ هۆش که‌وتم و نه‌مزانی چی بووه، ئیدی جه‌لیل گیان له‌ده‌ستده‌دات، کچه‌که‌یشم به ناوی به‌هار چاوێکی له‌ده‌ستده‌دات، کوڕێکی دیکەم به‌ناوی ئازاد ده‌ستی بریندار ببوو."
پاش ته‌قینه‌وه‌که، ته‌رمی جه‌لیل له‌لایه‌ن خه‌ڵکی گونده‌وه، بەخاکسپێردراوە، به‌هار و ئازادیش کە خوشک و برای بوون، براونەتە نەخۆشخانەی شاری جوانڕۆ، له‌وێشه‌وه بۆ نەخۆشخانەی "تاڵه‌قانی" کرماشان گوێزراونەتەوە.
له‌و ماوەیەدا پیرۆز ئاگاداری کوژرانی کوڕه‌که‌ی نەبووە و ته‌نیا ده‌زانێت شتێک روویداوه دەڵێت "من هه‌ر ئاگام له هیچ نه‌بوو، سه‌ره‌تا نه‌یانگوت کوڕه‌که‌م مردووه، گوتیان له نەخۆشخانەیە، به‌ڵام که خه‌ڵک بۆ سه‌ره‌خۆشی هاتن زانیم، ده‌مزانی پرسه‌یه و خه‌ڵک بۆ سه‌رخۆشی دێن، به‌ڵام که‌سم نه‌ده‌ناسی، وه‌ک شێتم لێهاتبوو، ته‌نانه‌ت گریانیشم نه‌ده‌هات، وامده‌زانی خه‌و ده‌بینم."
دوای تەواوبوونی پرسەی کوڕەکەی، ئینجا پیرۆز زانیویەتی کە بەهاری کچی چاوی لەدەستداوە، بەهار دوای دوو مانگ لە نەخۆشخانە براوەتەوە ماڵەوە و چەندین نەشتەرگەرییان بۆ کردبوو. دایکی دەڵێت، "سێ مانگ هاتووچۆی تارانمان کرد، هیچ سوودێکی نەبوو، تاوەکو لە کۆتاییدا گلێنەی چاویان دەرهێنا."
بەهار ئێستا تەمەنی 35 ساڵانە، ئەو جگه له لەده‌ستدانی چاوێکی، کێشه‌ی پشتیشی هه‌یه، ناتوانێت زۆر هاتووچۆ بکات، له کە قسەی بۆ رووداو کرد، لە حه‌وشه‌ی ماڵه‌که‌یاندا دانیشتبوو، داماوی و لێقەوماوی له هه‌موو گیانی ده‌باری، ئەو هیچ شتێکی له رۆژی رووداوە کارەساتبارییەکەی بەسەریان هات، لەبیر نییە. به ده‌نگێکی زۆر نزم که بیستنی سه‌خته ده‌ڵێت "ئێستاش ئازارم زۆره، سه‌ر و ده‌سته‌کانم به‌رده‌وام ده‌خورێن، چاوه ساخه‌که‌یشم به‌رده‌وام سوور ده‌بێتەوە، پشتیشم زۆر دێشێت، زۆر ناتوانم هاتووچۆ بکه‌م، ده‌رمانی زۆریش به‌کارده‌هێنم، به‌ڵام سوودی نییه."
پیرۆز یوسفی به قسه‌ی کچه‌که‌ی فرمێسکی راناوه‌ستێت و به له‌چکه سپییه‌که‌ی که هاوڕه‌نگی پرچه‌کانییه‌تی ده‌یانسڕێت و ده‌ڵێت "خۆ ئازارم یه‌ک و دووان نییه، ئه‌و دوو منداڵه‌م که ئیفلیج بوون، تاوەکو حه‌ڤده ساڵان کێشه‌یه‌کیان نه‌بوو، به‌ڵام له‌پڕدا ئیفلیج بوون، سه‌ردانی زۆر دکتۆرمان کرد، دکتۆره‌کان گوتیان ئه‌م نه‌خۆشییه ناوی "ئم ئێسه" بەهێزه و هیچ کارێکی له‌گه‌ڵ ناکرێت."
ئەو خێزانە تەنیا داهاتیان کارکردنی یەکێکی دیکە لە کوڕەکانی پیرۆزە، ئەو دەڵێت، تاوەکو ئێستاش کەیسی قەرەبووکردنەوەکەیان نەگەیشتووەتە ئەنجام.
زوهره فه‌لاحی کچه ئیفلیجه‌که‌ی پیرۆزه که ئێستا 40 ساڵا‌نه، ئەو بۆ 23 ساڵ ده‌چێت، له جێگەدا که‌وتووه و تووشی ئیفلیجی بووه، پرچه‌کانی به ته‌واوی سپی بوون و جه‌سته‌یه‌کی لاوازی هه‌یه. دایکی ده‌ڵێت، "سه‌ردانی زۆر شوێنم پێکردووه، بۆ دکتۆری تاران و ته‌ورێزم بردووه، به‌ڵام هیچ چاره‌سه‌رێکی نه‌بوو."
ئازاد ئەو کوڕەی پیرۆزە کە ئێستا خەریکی کرێکارییه و تاکە سەرچاوەی داهاتی ئەو خێزانە لێقەماوەیە، ئەو به رووداوی گوت "دۆخی بنه‌ماڵه‌كه‌مان ده‌بینن و پێویست به هیچ ناکات بڵێم، هه‌ر که‌س سه‌ردانێکی ئاسایی بکات، ده‌زانێت چۆنمان لێقه‌وماوه و بنه‌ماڵه‌که‌مان چۆن تێکوپێک دراوه، له که‌متر له سێ ساڵدا دوو برام له‌ده‌ستداوه و دۆخی خوشکه‌کانیشم ئه‌وه‌یه که ده‌یبینیت، منیش به‌ته‌نیا به راستی فریای خه‌رجیی بنه‌ماڵه‌که‌مان ناکه‌وم."
دوو خوشکەکەی ئازاد بەردەوام پێویستیان بە دەرمانە، دایکیشی دڵی تووشی نەخۆشی بووە و دەبێت سەردانی پزیشک بکات، ئەو تەنیا داواکاریی ئەوەیە کەیسی قەرەبووکردنەوەکەیان زوو بگاتە ئەنجام، "بۆئه‌وه‌ی لانی که‌م له کێشه‌ی ئابووریمان که‌م ببێته‌وه، ئه‌گینا تازه کوا ژیان بۆ من و بنه‌ماڵه‌که‌م ماوه."