بەڤیدیۆ: ئاگر لە لەنگەی هەولێر کەوتەوە

 

 

پەیامنێری رووداو دەڵێت، ژمارەیەکی زۆر لە تیمەکانی ئاگرکوژێنەوە لە شوێنی رووداوەکەن و لە 20 لاوە خەریکی کۆنترۆڵکردنی ئاگرەکەن.

 

تاوەکو ئێستا بە فەرمی نازانرێت هۆکاری رووداوەکە چییە. شایەتحاڵێک بە رووداوی گوت، "شۆرتی کارەبا هۆکاری ئاگرەکە بوو".

 

خاوەن دووکانەکان، کە بۆ پشووی ئێوارە رۆشتبوونەوە، گەڕاونەتەوە و هاوکاری تیمەکان دەکەن لە کۆنترۆڵکردنی ئاگرەکەدا.

 

لە پاش زیاتر لە دوو کاژێر لە بەردەوامیی ئاگرەکە، کاروان میراودەلی، گوتەبێژی بەرگریی شارستانیی هەولێر قسەی بۆ رۆژنامەڤانان کرد و گوتی، "تا رادەیەک لەژێر کۆنترۆڵی ئێمەدایە، ئاگرەکە بەرزە و دووکەڵەکەی مەترسیدارترە، داوا لە هاوڵاتیان دەکەین دووربکەونەوە".

 

گوتیشی، تاوەکو ئێستا نەیانتوانیوە بزانن هۆکاری ئاگرکەوتنەوەکە چیبووە.

 

 

پێشتریش لە مانگی تشرینی یەکەمی ساڵی 2018 ئاگرێکی گەورە لە بازاڕەکە کەوتەوە و بەهۆیەوە 1200 دووکانی بازاڕەکە سووتان، ئەوکات ئاگرەکە لە رێگەی بەکارهێنانی هێلیکۆپتەر و لە دوای بارینی بارانێکی بەلێزمە، کۆنترۆڵکرا.

 

بەپێی زانیارییەکانی پەیامنێری رووداو و ئەو شایەتحاڵانەی قسەیان بۆ کردوون، نزیکەی 30% بۆ 40%ـی دووکانەکانی بازاڕەکە سووتاون، لەکاتێکدا نزیکەی 2400 دووکانی تێدان، ئەو رێژەیە سەروو 800 دووکان دەکات کە ئەگەری سووتانیان هەیە.

 

شایەتحاڵان و خۆبەخشان کە بۆ کوژاندنەوەی ئاگرەکە چوونەتە بازاڕەکە و قسەیان بۆ پەیامنێرانی رووداو کرد ئاماژەیان بەوە دەکرد، "ئاوی پێویست نەبووە بۆ کوژاندنەوەی ئاگرەکە".