رووداو دیجیتاڵ
فەرماندەیی هێزەکانی جەندرمە بڕیاری قەدەخەی ناوچەی ئەمنیی تایبەتی لە سێ ناوچەی سەر بە پارێزگای شرنەخ لە باکووری کوردستان بۆ ماوەی 15 رۆژ راگەیاند.
پارێزگای شرنەخ بڵاویکردەوە، "لە چوارچێوەی بەرەنگاربوونەوەی تیرۆر و بەپشتبەستن بە بڕگەی ئەلیف لە مادەی 32ی یاسای ژمارە 2565ی تایبەت بە قەدەخەی سەربازی، پاراستنی ئاسایش و ئارامی، بڕیاردرا بە راگەیاندنی 15 رۆژ قەدەخەی ئەمنیی تایبەت لە سێ ناوچەی سەر بە شارۆچکەی گوچلوکۆناک و ناوچەکانی چیای گابار".
لە راگەیێندراوەکەی پارێزگای شرنەخدا هاتووە، قەدەخەی ناوچەی ئەمنیی تایبەت لە رۆژانی 26ـی کانوونی دووەم تاوەکو 9ـی شوباتی 2024 بۆ ماوەی 15 رۆژ بەردەوام دەبێت.
پارێزگای شرنەخ داوا لە هاونیشتمانیان دەکات، خۆیان بەدوور بگرن لەو ناوچانەی کە قەدەخەی ئەمنی تایبەت دەیانگرێتەوە و تەنیا لە کاتی پێویستدا و دوای وەرگرتنی مۆڵەت مافیان هەیە بەشێوەیەکی کاتیی کارەکانیان لەو ناوچانە ئەنجام بدەن؛ هەروەها داوای هاوکاریشیان لێ دەکات بۆ پێدانی زانیاری لەبارەی هەر جموجووڵێکی گوماناوی لە ناوچەکەدا.
ئەم بڕیارە بەپێی یاسا لە چوارچێوەی دەسەڵاتی پارێزگار و بە هاوئاهەنگی لەگەڵ فەرماندەیی هێزەکانی جەندرمە دەدرێت و دەڵێن، بڕیارەکە بەهۆی جموجووڵی گەریلاکانی پارتی کوردستان - پەکەکەیە لەو ناوچانەدا. زۆرجار دوای راگەیاندنی ئەم بڕیارانە، ئۆپەراسیۆنی سەربازی ئەنجام دەدرێن.
پار، 11 جار بڕیاری قەدەخەی ناوچەی ئەمنی تایبەت لە شرنەخی باکووری کوردستان راگەیێندرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ