هەڵواسینی پۆستەری بانگەشە لە شەقامێکی هەولێر. وێنە: بڵند تاهیر - رووداو
رووداو دیجیتاڵ
پۆستەری زۆر، گەورە و نزیک لە تابلۆکان بەرچاو روونی شۆفێرەکانی نەهێشتووە. ئەمە دۆخی هەر شۆفێرێکە بیەوێت لە بەشێکی شەقامە گشتییەکان بسووڕێتەوە.
شوێنە گشتییەکان، جێگا ئایینی و کەلەپوورییەکان، دەرەوە و ناوەوەی هەموو فەرمانگە حکومییەکان بەپێی یاسای تایبەت بە هەڵبژاردن و بانگەشە قەدەخەیە.
کاروان کازم، شارەزای یاساییە و بە رووداوی گوت: "بانگەشە نابێت زیان بە ژینگەی گشتی بگەیێنێت، نابێت رێگە و شوێنە گشتییەکان بەکاربهێنرێت، نابێت فەرمانبەرانی نێو فەرمانگەکان و باڵەخانەکانە حکومییەکانیش بەکاربهێنرێن، ئەوانە ئەگەر بکرێت، تاوانی هەڵبژاردنن".
د. یاسین محەممەد، شارەزای یاسای هەڵبژاردنە و بە رووداوی راگەیاند: "هەندێک لە بەربژێرەکان پێش وادەی فەرمیی دەسپێکردنی بانگەشە، دەستیان بە بانگەشەکردن کردووە و لە میدیاکانیشەوە بانگەشەیان بۆ خۆیان کردووە، هەندێکیشیان پێش کاژێر 12:00ی شەوی دەستپێکردنی بانگەشە، هەندێکیان وێنە و پۆستەرەکانی خۆیانیان بڵاوکردەوە".
لە ماوەی کەمتر لە 48 کاژێر لە دەستپێکی بانگەشەی هەڵبژاردن، 16 سکاڵا لەسەر بەربژێر و لیستەکان تۆمار کراون. شەشیان بۆ لێپێچینەوە نێردراونەتە ئەنجوومەنی کۆمیسیاران، شەش لە سکاڵاکان لە سلێمانی و 10شیان لە هەولێر تۆمار کراون.
مەروان محەممەد، سەرۆکی لقی هەولێری کۆمیسیۆنی باڵای سەربەخۆی هەڵبژاردنەکان بە رووداوی راگەیاند: "بەر لەوەی بانگەشەی هەڵبژاردن دەستپێبکات، چەند سکاڵایەکمان هەبوو. دواتریش سکاڵای دیکە هەبوو، بەتایبەت دوو لە سکاڵاکان لەلایەن وەزارەتی ئەوقافەوە پێشکەشکرابوون، ئەوانە لێکۆڵینەوەیان لەسەر کراوە و نێردراون بۆ لیژنەی ناوەندی و ئەوانیش دەیدەن بە ئەنجوومەنی کۆمیسیاران".
ئامانج عەزیز، سەرۆکی لقی سلێمانیی کۆمیسیۆنی باڵای سەربەخۆی هەڵبژاردنەکان لەبارەی رێکارەکانیەوە لەگەڵ سەرپێچیکاران گوتی: "چاودێریی سەرجەم رێوشوێنەکان و کارەکانی بەربژێر و لیسیتەکان دەکەین و هەر کەس سەرپێچی بکات، یەکسەر دەیکەین بە راپۆرت و دەیدەنە ئەنجوومەنی کۆمیسیاران لە بەغداد".
بەپێی یاسا، ئەگەر سەرپێچی لەسەر بەربژێرێک ساخ ببێتەوە، لەنێوان مانگێک تا ساڵێک زیاتر زیندانی دەکرێت یان بە 100 هەزار تا 50 ملیۆن دینار سزا دەدرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ