بۆ یەکەمین جار کۆنسێرتێکی ئۆپێرا لەسەر قەڵای هەولێر بەڕێوەدەچێت
رووداو دیجیتاڵ
بۆ یەکەمجار لە هەرێمی کوردستان و لەسەر قەڵای هەولێر لە لایەن ماڵی میوزیکی زەهاوی کۆنسێرتێکی ئۆپێرا بەڕێوەچوو. کۆنسێرتەکە لە لایەن پەروین چاکار، هونەرمەندی باکووری کوردستان پێشکێش کرا.
پەروین چاکار، هونەرمەند بە رووداوی گوت: "ئەوە یەکەمجار بوو بۆمن، سەرەتا وامزانی کە خەڵکی ئێمە لێرە لە هەرێمی کوردستان حەز لەو جۆرە گۆرانییە ناکەن، بەڵام زۆر بەدڵیان بوو و چەپڵەیان لێدەدا. من زۆر سەربەرزم و سوپاسی هەمووان دەکەم."
هەژار زەهاوی، کە رێکخەری کۆنسێرتەکە بوو باسی لەوە کرد: "[ئۆپێرا] ستایلێکی زۆر زۆر قورسە، هەر کەس و نەتەوەیەک ناتوانێت ئەوە رێکبخات، بەڕاستی ئەمشەو بینەرێکی 300 کەسی کاژێرێک و 20 خولەک گوێیان لە ئۆپێرا بوو."
لە کۆنسێرتەکەدا کە ژمارەیەکی بەرچاو لە سیاسی، هونەرمەند، میوزیکژەن و خەڵکی ئاسایی تێیدا بەشدار بوون، هونەرمەندە کوردەکە بە زمانی جیاواز گۆرانی پێشکێشی ئامادەبووان کرد، هەروەها چەندین گۆرانیی کۆنی کوردیشی پێشکێش کرد.
شێرکۆ حەمە ساڵح، میوزیکژەن و بەشداربوویەکی کۆنسێرتەکە دەڵێت: "لەمەوە بۆمان دەردەکەوێت کە میوزیکی کوردی چەندە دەوڵەمەند و لەبارە بۆ ئەوەی دانەرە کوردەکانمان بتوانن کار لەسەر ئەوە بکەن کە زمانی کوردی ببێتە زمانێکی جیهانی لەڕووی گوتن و خوێندنی ئۆپێرادا."
پەروین چاکار ماوەی 11 ساڵە لە ئیتاڵیا ئۆپێرای بەشێوەی ئەکادیمی خوێندووە و ئێستا دانیشتووی ئەڵمانیایە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ