هەسەدە خزمەتی سەربازیی زیاد کرد و بڕیاری دەستپێکردنەوەی دیالۆگی کوردی - کوردی دا

 

ئەنجوومەنی سەربازیی هێزەکانی سووریای دیموکرات ناسراو بە هەسەدە، کۆبوونەوەی خولیی خۆی بە سەرۆکایەتی مەزڵووم عەبدی، فەرماندەی گشتیی ئەو هێزانە و ئەندامانی سەرکردایەتیی گشتیی هێزەکە کرد.

 

ئەنجوومەنەکە رۆژی هەینی، 26-07-2024 راگەیێندراوێکی لەبارەی کۆبوونەوەکە بڵاوکردەوە: "باسی دۆخی سووریا بە گشتی، ناوچەکانی باکوور و رۆژهەڵاتی سووریا بەتایبەت کرا، جەخت ک لە گرتنەبەری سیاسەتێکی کردەیی و کراوە بەرامبەر بە هەمووان بۆ هەموو پرسەکان و ئامادەبوون بۆ هەر پێشهاتێک، کرایەوە."

 

ئەنجوومەنەکە داوای: "پەرەپێدانی دەستپێشخەریی چارەسەی لەچوارچێوەی سووریا" کردووەتەوە.

 

سەبارەت بە هێرشەکانی تورکیاش بۆ سەر ئەو ناوچەکانی باکوور و رۆژهەڵاتی سووریا، بەپێی راگەیێندراوەکە بەشداربووانی کۆبوونەوەکە، کارکردن و هەوڵە بەردەوامەکانیان لەگەڵ دامەزراوە نێودەوڵەتییەکان بۆ راگرتنی ئەو هێرشانە، دووپاتکردووەتەوە.

 

کۆبوونەوە کاری هاوبەشی هێزەکانی سووریای دیموکرات و هاوپەیمانی نێودەوڵەتیی شەڕی دژ بە داعشی بەرز نرخاندووە، بۆ گیراوانی داعش و چارەسەرکردنی کێشەی کەمپی هۆل دەڵێت: "ئەنجامی باش بەدەستهاتوون."

 

کۆبوونەوەکە بڕیاری لێخۆشبوونی گشتیی بۆ ئەو کەسانە دەرکرد کە لە خزمەتی سەربازی هەڵاتوون، جگە لە یەکلاییکردنەوەی دۆخی ئەو کەسانەی دواکەوتوون یان گوێزراونەتەوە و لێژنەیەک بۆ ئەو مەبەستەش دروستدەکرێت.

 

یەکێکی دیکە لە بڕیارەکانی کۆبوونەوە زیادکردنی ماوەی گرێبەستی پەیوەندیکردنە بە هێزە سەربازییەکان لە دوو ساڵەوە بۆ سێ ساڵ، جگە لە زیادکردنی خولی سەربازی و تایبەتمەند بەتایبەت بۆ سەربازە نوێیەکان.

 

لە کۆبوونەوەکەدا باسی زیادبوونی هێرشەکانی داعش کراوە، جگە لە رووبەڕووبوونەوەی ئەو هێزانەی تورکیا پشتیوانییان دەکات لە منبج و زەرکانەوە.

 

سەبارەت بە دیالۆگی کوردی - کوردی، واتە دیالۆگی نێوان ئەنجوومەنی نیشتمانی کورد لە سووریا (ئەنەکەسە) و پارتەکانی یەکێتی نیشتمانی کورد (پەیەنەکە)، لە کۆبوونەوەکە بڕیاری کارکردنەوەی دیالۆگەکە درا.