جەبار یاوەر: هەنگاوە گرنگەکەی نێچیرڤان بارزانی کۆبوونەوەی پارتی و یەکێتیی لێکەوتەوە

 

 

جەبار یاوەر، ئەمینداری گشتیی وەزارەتی پێشمەرگە رۆژی پێنجشەممە 26-05-2022، میوانی بوولتەنی هەواڵەکانی کاژێر 08:00 بوو، کە بێستوون عوسمان لە ستۆدیۆکانی سلێمانیی تۆڕی میدیایی رووداوەوە پێشکێشی دەکات.

 

لەبارەی چاکسازی لە وەزارەتی پێشمەرگە، ئەمینداری گشتیی وەزارەتی پێشمەرگە دەڵێت، "پرۆسەی یەکخستنی هێزی پێشمەرگە بەشێکە لە پرۆسەی چاکسازی لە وەزارەتی پێشمەرگە و بەشێکە لەو پرۆژە 35 خاڵییەی کە پێشتر لەنێوان وەزارەتی پێشمەرگە و 4 وڵات (ئەمریکا، بەریتانیا، هۆڵەندا و ئەڵمانیا) رێککەوتنی لەسەر کراوە و لە ساڵی 2018وە کاری لەسەر دەکرێت."

 

بە گوتەی جەبار یاوەر، لە پرسی رێگری لە یەکخستنی هێزی پێشمەرگە بابەتەکە ژمارە نییە تاوەکو بێن و لە چوارچێوەی وەزارەتی پێشمەرگە کۆیان بکەنەوە، "ئەوەی کە زۆر گرنگە چۆنێتیی یەکخستنی بیر و باوەڕە، چونکە هێزە چەکدارەکان لە هەموو دونیادا بیر و باوەڕێکی جەنگییان هەیە و دەبێت لە خزمەتی نیشتماندا بن و بەرژەوەندیی باڵایان نیشتمان بێت نەک بەرژەوەندیی حیزبی و تاکەکەسی."

 

ئەمینداری گشتیی وەزارەتی پێشمەرگە ئاماژە بەوەش دەدات کە "پرۆسەی یەکخستنی هێزی پێشمەرگە بەردەوامە، تاوەکو دوێنێ و پێرێ دوو لیوای تازەمان لە چوارچێوەی وەزارەتی پێشمەرگە یەکخستووە. ئێمە لە وەزارەتی پێشمەرگە 21 لیوای یەکگرتوومان هەیە، کە لە یەکەکانی 70 و 80وە وەرگیراون، واتە لە یەکێتی و پارتی، لەگەڵ دوو هێزی گەورە کە ژمارەکەیان دەگاتە سەرووی 60 هەزار پێشمەرگە."

 

سەبارەت بە هەڵسەنگاندنیان بۆ رۆڵی سەرۆکی هەرێمی کوردستان، بەو پێیەی فەرماندەی گشتیی هێزەکانی پێشمەرگەیە لە پرسی یەکخستنی هێزەکانی پێشمەرگە، جەبار یاوەر گوتی، "ئەو هەنگاوەی سەرۆکی هەرێم، هەنگاوێکی زۆر گرنگ بوو، بەتایبەتی سەردانیکردنی شاری سلێمانی و کۆبوونەوەی لەگەڵ لایەنە سیاسییەکان، بەتایبەت ئەو گوتارەی لە کۆلێژی قەڵاچوالان پێشکێشی کرد، ئاماژەیەکی زۆر گرنگی تێدابوو هەم بۆ ئاییندەی پەیوەندیمان لەگەڵ بەغدا کە ئێمە ئامادەین بۆ چارەسەری کێشەکانمان، هەم بۆ مەسەلەی یەکخستنی هێزی پێشمەرگەی کوردستان، هەم بۆ مەسەلەی ئاشتەوایی لە هەرێمی کوردستان، هەم بۆ مەسەلەی چۆنێتیی دوورخستنەوەی مەترسییەکان."

 

جەبار یاوەر گوتیشی، "دەرئەنجامی ئەو هەنگاوە گرنگەش، بینیمان یەکەم کۆبوونەوەی لەنێوان یەکێتیی نیشتمانیی کوردستان و پارتی دیموکراتی کوردستانی لێکەوتەوە، لە هەمان کاتدا پەرلەمانیش کۆبوونەوەی هەبوو. هەموومان ئومێدێکی گەورەمان هەیە وردە وردە لەگەڵ هەموو حیزبە سیاسییەکان ئەو هەنگاوانە بنرێن، بۆئەوەی لەسەر پرسە نیشتمانییەکان رێککەوین."