ژنێک لە دەریاچەی دووکان دیارنەماوە و تیمەکانی فریاگوزاریی بەشوێنیدا دەگەڕێن
رووداو دیجیتاڵ
ژنێک دەچێتە نێو بەلەمێکی گەشتیاریی دەریاچەی دووکانەوە و داوا لە شۆفێرەکە دەکات لەسەر دوورگەیەک دایبگرێت و دواتر بگەڕێتەوە بەشوێنیدا، بەڵام کاتێک شۆفێری بەلەمەکە دەگەڕێتەوە بۆ دوورگەکە، ژنەکە دیار نەماوە؛ ئێستا تیمەکانی بەرگریی شارستانیی سلێمانی بەدوایدا دەگەڕێن.
رووداوەکە ئەمڕۆ هەینی روویداوە، رائید ئارام عەلی، گوتەبێژی بەرگریی شارستانیی سلێمانی هەواڵەکەی بۆ تۆڕی میدیایی رووداو پشتڕاستکردەوە.
گوتەبێژی بەرگریی شارستانیی سلێمانی بە رووداوی راگەیاند، "نیوەرۆی ئەمڕۆ کەسێک بە رووخسارێکی داپۆشراوەوە، لەگەڵ بەلەمێکدا چووەتە دوورگەیەکی دووکان و داوای لە بەلەمەوانەکە کردووە دوای کاژێرێک بگەڕێتەوە بۆلای، بەڵام کاتێک بەلەمەوانەکە دەگەڕێتەوە کەسەکە لەوێ نەماوە".
ئاماژەى بەئەوەشدا، ئێستا هەموو تیمەکانیان لەوێ بەدوای ئەو کەسەدا دەگەڕێن، نازانن خنکاوە یان چی بەسەرهاتووە.
بەپێی زانیارییەکانی رووداو، ئەو کەسە رەگەزی مێیە و تەمەنی نزیکەی 30 ساڵە، داوای لە بەلەمەوانەکە کردووە بۆ مەلەکردن بیباتە ئەو شوێنە و پاش کاژێرێک بچێتەوە بەدوایدا، بەڵام کە بەلەمەوانەکە دەچێتەوە ئەو شوێنە تەنیا جلوبەرگەکەی و هەندێک کەلوپەلی لەوێ ماوە و خۆی دیارنییە، بۆیە هێزە ئەمنییەکان ئاگاداردەکاتەوە.
ئێستا هێزە ئەمنییەکان و تیمەکانی بەرگریی شارستانیی لە شوێنی رووداوەکەن بە مەبەستی دۆزینەوەی سۆراخی ئەو کەسە.