وەزارەتی دارایی بۆ رووداو: هێشتا کات ماوە بۆئەوەی باسی دابەشکردنی مووچەی مانگی نیسان بکەین

 

 

سەمیر هەورامی، گوتەبێژی جێگری سەرۆکوەزیرانیش رایگەیاند، داواکاری و مەرجەکانی تیمی یەکێتییان بە حکومەت گەیاندووە، سەرەکیترینیان مووچەی مووچەخۆرانی سلێمانییە و دەشڵێت، جیاکاری لە دابەشکردنی مووچەدا کراوە.

 

ئەم هەفتەیە دابەشکردنی مووچەی مانگی ئادار لە سلێمانی کێشەی تێکەوت، بەهۆیەوە مانگرتن لە شارەوانیی سلێمانی دەستیپێکرد، جگە لەوەش یەکێتی و پارتی یەکدییان بە راگرتنی دابەشکردنی مووچەی پێشمەرگەکانیان تۆمەتبار کرد.

 

وەزارەتی دارایی لە راگەیێندراوێکدا رۆژی چوارشەممە رایگەیاند، لە دابەشکردنی مووچەی مانگی ئادار لە سنووری سلێمانی، گەرمیان و راپەڕین جیاکاری کراوە و دەڵێت، ئەوەی کراوە کاری سەربەخۆی لقی سلێمانیی بانکی ناوەندییە و بڕیاردەری ئەو کارە رووبەڕووی لێپرسینەوە دەکەنەوە.

 

هونەر جەمال، گوتەبێژی وەزارەتی دارایی و ئابووریی هەرێمی کوردستان رایگەیاند، "هەموو هەوڵێکمان بۆ دابینکردنی مووچەیە، بۆ ئەو مەبەستەش کار لەسەر هەموو رێگەکان دەکەین؛ ئەوەی کە هەبێت لەگەڵ سامانە سرووشتییەکان و حکومەتی عێراق قسە دەکەین، داهاتی ناوخۆ و بڕێکی کەم هاوکاریی هاوپەیمانیی نێودەوڵەتییش هەیە. هێشتا کاتیش ماوە بۆئەوەی باس لە دابەشکردنی مووچەی مانگی نیسان بکەین، چونکە هێشتا بەشێک لە مووچەی مووچەخۆرانی وەزارەتەکان و خانەنشینان بۆ مانگی سێ دابەش نەکراوە، کە ئەوەش بەشێکی زۆری لە سلێمانییە و لەسەر داهاتی ناوخۆیە."

 

ماوەی شەش مانگ دەبێت قوباد تاڵەبانی و چوار مانگیشە وەزیرانی یەکێتی بەشداریی کۆبوونەوەکانی ئەنجوومەنی وەزیران ناکەن، رۆژی 17ـی ئەم مانگە تیمێکی ئەنجوومەنی وەزیران سەردانی قوباد تاڵەبانیان کرد، بەڵام تیمی یەکێتی دەڵێن تاوەکو داواکارییەکانیان جێبەجێ نەکرێن، ناگەڕێنەوە.