کوردستان
بەڕێوەبەری گشتیی گومرگی هەرێمی كوردستان: لەرووی تەندروستییەوە دەتوانرێت ئەو دەروازانەش كۆنترۆڵ بكرێن
رووداو - سلێمانی
بەڕێوەبەری گشتیی گومرگی هەرێمی كوردستان رایگەیاند، داوایان لە ئەنجوومەنی وەزیران كردووە هاوشێوەی دەروازەی سنووریی سەیرانبەن، دەروازەكانی كێلێ ، پشتە و تەوێڵە بكرێنەوە.
ساماڵ عەبدولڕەحمان، بەڕێوەبەری گشتیی گومرگی هەرێمی كوردستان بە تۆڕی میدیایی رووداوی راگەیاند، دوای كەمبوونەوەی مەترسییەكانی كۆرۆنا و تووندكردنی رێكارە تەندروستییەكان لە دەروازەكاندا، دەروازەی فەرمیی سەیرانبەنیان كردووەتەوە.
بەڕێوەبەری گشتیی گومرگی هەرێمی كوردستان ئاماژەی بەوە کرد، "دوای كردنەوەی دەروازەی سەیرانبەن داوامان لە ئەنجوومەنی وەزیران كردووە هەرسێ دەروازەی فەرمیی كێلێ و پشتە و تەوێڵەش بكرێنەوە و چاوەڕێی وەڵامین، چونكە لە رووی تەندروستییەوە دەتوانرێت ئەو دەروازانەش كۆنترۆڵ بكرێن".
ساماڵ عەبدولڕەحمان ئەوەشی خستەڕوو كردنەوەی ئەو دەروازانە هاوكارێكی باش دەبێت لەسەر كەمكردنەوەی گوشاری سەر دەروازە نێودەوڵەتییەكانی باشماخ و حاجی ئۆمەران و پەروێزخان.
بەڕێوەبەری گشتیی گومرگ باسی لەوە کرد، "دۆخی ئابووریی هەرێمی كوردستانیش ئەوە دەخوازێ‌ت ئەو سێ دەروازەیەش بكرێنەوە، بۆ ئەوەش داواكارییەكی زۆر هەیە و گەشبینیشین بە كردنەوەیان، بە تایبەت كە بەڵێنی ئەوەمان وەرگرتووە دەتوانرێت كۆنترۆڵێكی باشی تەندروستییان تێدا بكرێت".
پێشتر بەهۆی ڤایرۆسی كۆرۆناوە حكومەتی هەرێمی كوردستان بۆ ئاڵوگۆڕی بازرگانی تەنیا دەروازە نێودەوڵەتییەكانی پەروێزخان، باشماخ، حاجی ئۆمەران و ئیبراهیم خەلیلی كردبوونەوە و دەروازەكانی پشتە، كێلێ، سەیرانبەن، تەوێڵە و سەرجەم دەروازە لاوكییەكانی داخستبوون.
رۆژی چوارشەممەی رابردوو ئەنجوومەنی وەزیرانی هەرێمی کوردستان کۆبووەوە و یەکێک لە بڕیارەکانی کۆبوونەوەکە کردنەوەی دەروازەی سەیرانبەن بوو لە سنووری پارێزگای سلێمانی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ