رووداو دیجیتاڵ
بەگوێرەی نوێترین ئامار، تاوەکو ئەمڕۆ دەزگای خێرخوازیی بارزانی هاوکاریی مرۆیی گەیاندووەتە زیاتر لە 358 هەزار خێزانی زیانلێکەتووی بوومەلەرزە؛ سەرۆکی دەزگاکە دەڵێت، رۆژانە خۆراکی بەربانگ و پاشیڤ بۆ لێقەوماوانی بوومەلەرزە لە شارەکانی ئامەد و مەرەش لە باکووری کوردستان و هاتای لە تورکیا دابیندەکەن.
رۆژی یەکشەممە 26ـی ئاداری 2023، موسا ئەحمەد، سەرۆکی دەزگای خێرخوازیی بارزانی بە تۆڕی میدیایی رووداوی راگەیاند، هاوکارییەکانیان بۆ زیانلێکەتووانی بوومەلەرزە بەردەوامە. گوتیشی: "لە مانگی رەمەزاندا رۆژانە خۆراکی گەرم بۆ بەربانگ و پارشێو لە شارەکانی دیار بەکر {ئامەد}، مەڕەش و هاتای دابیندەکەین."
لەبارەی عەفرینەوە، موسا ئەحمەد رایگەیاند، لە رێگەی فڕنەوە بێ بەرامبەر نان دەدەنە خەڵکی سنوورەکە و گەڕانی تیمەکانی تەندروستییان بە شارۆچکە و گوندەکانی سنوورەکەدا بەردەوامە.
بەگوێرەی نوێترین ئاماری دەزگای خێرخوازیی بارزانی، تاوەکو ئەم هەفتەیە، دەزگاکە هاوکاریی مرۆیی گەیاندووەتە 358 هەزار و 215 خێزان، زۆرترین خێزانی سوودمەندبوو لە شاری مەرەش بوون کە 108 هەزار و 327 خێزان بوون.
ناوچەیەکی دیکەی هاوکارییەکانی دەزگای خێرخوازیی بارزانی، عەفرین و ناوچەکانی دەوروبەرین لە رۆژئاوای کوردستان کە بەپێی ئامارەکە تاوەکو ئەمڕۆ لەو سنوورە 61 هەزار و 782 خێزان لە هاوکارییەکان سوودمەند بوون.
هاوکارییەکانی دەزگای خێرخوازیی بارزانی بۆ باکوور و رۆژئاوای کوردستان بریتین لەمانە:
- ژەمە خۆراکی گەرم
- بەتانی، دۆشەک و سەرین
- ئاوی خواردنەوە
- ژەمە خۆراکی وشک
- ژەمە خۆراکی خێرا
- هاوکاریی پزیشکی
- جلوبەرگی جۆراوجۆر
- خێوەت
- پارەی کاش
- پاکێجی منداڵان و شیری منداڵان
- خەڵووز
- پێویستیی نێوماڵ
- ئامێری بیناسازی
ئەو شوێنانەی هاوکارییەکانیان پێگەیشتووە:
- مەرەش
- سەمسوور
- دیلۆک
- رووها
- ئامەد
- مەلەتی
- عەفرین
- سلۆپی
- نوسێبین
- ئەدەنە
- هاتای
رۆژی 6ـی شوباتی 2023، بوومەلەرزەیەکی بەهێز لە باکووری کوردستان روویدا، کە کاریگەریی لەسەر تورکیا، رۆژئاوای کوردستان و سووریاش هەبوو؛ بوومەلەرزەکە بووە هۆی گیانلەدەستدانی زیاتر لە 55 هەزار کەس لە سەرجەم ناوچە زیانلێکەوتووەکان و برینداربوونی سەروو 100 هەزار کەس.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ