ئەو پۆلیسانەی لە ئامەد مێردمنداڵە کوردەکەیان ئەشکەنجە دا، لە کار دەرکران

 

 

لە راگەیێندراوەکەی پارێزگای ئامەددا هاتووە، رۆژی یەکشەممە 26-03-2023 پێنج پۆلیس کە نەورۆزی ئەمساڵ لە ئاهەنگی نەورۆزی شارۆچکەی لیجەی سەر بە ئامەد لە مێردمنداڵێکی تەمەن 14 ساڵیان داوە، دەستگیر کران و لە کارەکانیان دوورخرانەوە؛ کە یەکێکیان پلەدارە.

 

ئەو مێردمنداڵە (ی دیکەن) رۆژی نەورۆز 21-03-2023 لەگەڵ هاوڕێیەکی تەمەن 10 ساڵانی لە رێگەی گەڕانەوە بووە بۆ ماڵەوە. تیمێکی پۆلیس وەستاندوویانن، بە هاوڕێکەییان گوتووە بڕوات و (ی دیکەن)یشیان سەرخستووەتە ئۆتۆمبیل و ئەشکەنجەیان داوە. مێردمنداڵەکە دەڵێت، "بە زۆر دەیانگوت دەبێت بڵێیت: 'من تورکم.' جنێو و قسەی نەشیاویان بە کورد دەدا. دەیانگوت مارشی ئیستقلال (مارشی نیشتمانیی تورکیا) بخوێنە. هەروەها هەڕەشەی کوشتنیان دەکرد."

 

دواتر ئەو پۆلیسانە مێردمنداڵەکەیان بە دەست و دەم بەستراوی لە شوێنێکی دوورە دەست جێهێشتووە. (ی دیکەن) تاوەکو شەو درەنگ لەوێ ماوەتەوە و دواتریش گوندنشینێک کە بە نزیک ئەو شوێنەدا تێپەڕیوە، دۆزیویەتییەوە و دەم و دەستی کردووەتەوە.

 

ئەو مێردمنداڵە کوردە تەمەن 14 ساڵە لەلایەن ئەو پۆلیسانەوە لێی دراوە، چەند برینێک لەسەر جەستەی هەیە و مەترسیی لەدەستدانی چاوێکی لەسەرە.

 

بارۆی ئامەد لەسەر ئەو دۆسیەیە سکاڵای لای داواکاری گشتی تۆمار کرد و دەست بە لێکۆڵینەوە کراوە.

 

پارێزگای ئامەد لە راگەیێندراوەکەیدا رەتیکردووەتەوە مێردمنداڵەکە گیانی لەدەستدابێت و دەڵێت، "دوای ئەوەی ژمارەیەکی زۆر لە پۆلیسەکانی ناوچەکە برانە بەردەمی، (ی دیکەن) پێنج پۆلیسی ناسیوەتەوە کە ئەشکەنجەیان داوە. ئەو پێنج پۆلیسە کە یەکێکیان پلەدارە، لە ئەرکەکانیان دوورخرانەوە و دەستبەسەرن. لێکۆڵینەوەش لەو دۆسیەیە بەردەوامە."

 

یڵماز دیکەن، باوکی مێردمنداڵەکە رایگەیاند، ئێوارەی دووشەممە 20-03-2023 ئەو تیمانەی پۆلیس بۆ بڵاوەپێکردنی ئەو منداڵانە نێردرابوون کە ئاگریان دەکردەوە و کوڕەکەی ئەویش لەگەڵ هاوڕێیەکی رایانکردووە و دواتریش لەلایەن پۆلیسەکانەوە دەستگیر کراون.