رووداو دیجیتاڵ
حەسەن سالم، پەرلەمانتاری فراکسیۆنی سادیقونی سەر بە گرووپی عەسائیبی ئەهلی حەق، کەرکووک بە "شارێکی عەرەبی" دەزانێت و دەڵێت، ناسنامەکەی نەگۆڕاوە، ئەوەشی وەکو وەڵامی قسەکانی سەرۆک بارزانی ناوهێناوە کە هەفتەی رابردوو لە هەڤپەیڤینێکدا گوتبووی "هیچ شتێک لەم جیهانە ناتوانێت ناسنامه راسته‌قینه‌كه‌ی كه‌ركووك بگۆڕێت".
لە تویتێکدا لەبارەی کەرکووکەوە، حەسەن سالم، پەرلەمانتاری فراکسیۆنی سادیقونی سەر بە گرووپی عەسائیبی ئەهلی حەق، کە قەیس خەزعەلی سەرۆکایەتی دەکات، لەبارەی کەرکووکەوە دەڵێت: "کەرکووک بە عەرەبی دەمێنێتەوە و رووخاندنی 114 گوندی عەرەب ناسنامەی نەگۆڕیوە."
تویتەکەی حەسەن سالم، کە لە خولی پێشووی پەرلەمانی عێراق سەرۆکی فراکسیۆنی سادیقون بوو، لە دوای هەڤپەیڤینێکی سەرۆک بارزانی دێت لەگەڵ کەناڵی بی بی سی، کە رایگەیاندبوو "هیچ هێزێک لە جیهان ناتوانێت ناسنامەی راستەقینەی کەرکووک بگۆڕێت."
لە سەرجەم هەڵبژاردنەکانی دوای ساڵی 2003 کورد لە پارێزگای کەرکووک دەنگی یەکەم و زۆرینە بووە، لەدوایین هەڵبژاردن کە لە ئۆکتۆبەری 2021 لە عێراق کرا، لە 13 کورسیی پارێزگاکە کورد شەش کورسی بەدەستهێنا.
ئەنجامی دوایین هەڵبژاردن لە کەرکووک:
کورد: 6 کورسی
کۆی دەنگی بەربژێرە براوەکان: 123 هەزار و 178 دەنگ
عەرەب: 4 کورسی
کۆی دەنگی بەربژێرە براوەکان: 63 هەزار و 400 دەنگ
تورکمان: 2 کورسی
کۆی دەنگی بەربژێرە براوەکان: 30 هەزار و 791 دەنگ
کریستیان: 1 کورسی
کۆی دەنگی بەربژێرە براوەکە: 5 هەزار و 287 دەنگ
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ