نێچیرڤان بارزانی لە ساڵیادی رزگارکردنی کۆبانێ: بە رێز و پێزانینەوە یادی قوربانییانی ئەو قارەمانییە گەورەیە دەکەینەوە
رووداو دیجیتاڵ
سەرۆکی هەرێمی کوردستان بە بۆنەی ساڵیادی رزگارکردنی کۆبانێ پەیامێکی بڵاوکردەوە و دەڵێت، "لەم بۆنەیەدا بە رێز و پێزانینەوە یادی قوربانییانی ئەو قارەمانییە گەورەیە دەکەینەوە."
نێچیرڤان بارزانی، سەرۆکی هەرێمی کوردستان، ئەمڕۆ پێنجشەممە، 26-01-2023، بە بۆنەی ساڵیادی رزگارکردنی کۆبانێ راگەیێندراوێکی بڵاوکردەوە، پیرۆزبایی ئەو یادە لە "هەموو گەلی کوردستان" دەکات و دەڵێت، "گەلی کوردستان هیچ کاتێک هاوکاریی هاوپەیمانیی نێودەوڵەتی بۆ شەڕی دژی تیرۆر لەیاد ناکات."
رۆژی 26-01-2015، کۆبانێ لە دەستی داعش رزگارکرا. کۆبانێ لە شەڕی دژی داعش وەکو سیمبولی یەکگرتنی کورد لێکدرایەوە، هێزی پێشمەرگەی کوردستان دوای پەسندکردنی لەلایەن پەرلەمان و بە فەرمانی سەرۆک بارزانی رەوانەی کۆبانێ کرا و بەشداری لە کۆنترۆڵکردنەوەی شارەکەدا کرد.
هێزی پێشمەرگە چوونە باکووری کوردستان و لەوێشەوە بۆ رۆژئاوای کوردستان، رۆڵێکی گرنگی هەبوو لەوەی کۆبانێ بە تەواوی نەکەوێتە دەستی داعش، پێکەوە لەگەڵ شەڕڤانان شەڕی کۆڵان بە کۆڵانیان دژی چەکدارانی داعش کرد و شارەکەیان کۆنترۆڵکردەوە.
Salvegera azadkirina Kobanê li hemû gelê Kurdistanê pîroz dikim. Di vê bîranînê de em bi rêz û pêzanîn cangoriyên vê qehremaniya mezin bi bîr tînin, xwe li ber canê wan ditewînin. Gelê Kurdistanê ti carî alîkariya Hevpeymaniya Navnetweyî ya ji bo şerê li dijî terorê ji bîr nake.
— Nechirvan Barzani (@IKRPresident) January 26, 2023
دەقی پەیامەکەی نێچیرڤان بارزانی، سەرۆکی هەرێمی کوردستان بەبۆنەی ساڵیادی رزگارکردنی کۆبانێ:
ساڵیادی رزگارکردنی کۆبانێ لە هەموو گەلی کوردستان پیرۆز دەکەم. لەم بۆنەیەدا بە رێز و پێزانینەوە یادی قوربانییانی ئەو قارەمانییە گەورەیە دەکەینەوە. سەری رێزیان بۆ دادەنەوێنین، گەلی کوردستان هیچ کاتێک هاوکاریی هاوپەیمانیی نێودەوڵەتی بۆ شەڕی دژی تیرۆر لە یاد ناکات.