ئەنجوومەنی پارێزگای دهۆک: 25 رۆژ جارێک یەک بوتڵ گاز بە ماڵان دەدرێت

 

رۆژی پێنجشەممە، 26-01-2023، عەبدولسەمەد تێلی، سەرۆکی لیژنەی سووتەمەنی و وزە لە ئەنجوومەنی پارێزگای دهۆک میوانی بووڵتەنی نیڤڕۆژی تۆڕی میدیایی رووداو بوو کە شەهیان تەحسین پێشکێشی دەکات، رایگەیاند: "لە دهۆک 280 هەزار خێزان هەن و 84 هەزار خێزانی پەنابەر و ئاوارەشی لێ نیشتەجێ کراون، کە سەرجەمی دەکاتە 364 هەزار خێزان، وەزارەتی سامانە سرووشتییەکان رۆژانە هەشت تانکەر گاز دەداتە دهۆک و پاڵاوگەی لانازیش دوو تانکەر دەنێرێت کە دەکاتە 200 تۆن".

 

عەبدولسەمەد تێلی دەڵێت: "بەگوێرەی ئەو 200 تۆن گازەی وەکو پشکی دهۆک دیاریکراوە، هەر خێزانێک لە 25 رۆژدا بوتڵێک گازی بەردەکەوێت، ئەوەش زۆر کەمە، بەتایبەت لە وەرزی زستاندا کە خواست لەسەر گاز زیاتر دەبێت و هەندێک خێزان بۆ گەرمکردنەوەی ماڵەکانیان بەکاریدەهێنن".

 

سەرۆکی لیژنەی سووتەمەنی و وزە لە ئەنجوومەنی پارێزگای دهۆک ئاماژەی بەوەدا: "کۆمپانیای دانا گاز رۆژانە لە نێوان 55 تاوەکو 60 تانکەر گاز بەرهەمدەهێنێت و لەو ژمارەیە 12 تانکەر دەداتە پارێزگای سلێمانی و 13 تانکەر دەداتە هەولێر و هەشت تانکەریش دەداتە پارێزگای دهۆک، هاوکات پاڵاوگەی لانازیش دوو تانکەر دەداتە هەولێر و دوو تانکەریش بۆ دهۆک دەنێرێت، کۆمپانیای دانا گاز نیوەی ئەو گازەی بەرهەمی دەهێنێت، لە بازاڕی ئازاددا دەیفرۆشێتەوە".

 

عەبدولسەمەد تێلی گوتی: "مەرجی حکومەتی هەرێمی کوردستان بۆ کۆمپانیای دانا گاز ئەوەیە، کاتێک پێداویستیی گازی هاووڵاتییانی پڕکردەوە، ئەوەی مایەوە دەتوانێت لە بازاڕی ئازاد دا بیفرۆشێتەوە، بەڵام ئەم کۆمپانیایە بە هاوین و زستان کە ئاستی بەکارهێنانی گاز جیاوازی یەکجار زۆرە، هەر بە یەک رێژە گاز بەسەر پارێزگاکاندا دابەشدەکات و ئەوی دیکەی دەفرۆشێتەوە".

 

لەبارەی کێشەی کەمیی گازی ماڵان و فرۆشتنی گازی حکومی لە کارگەکانی بەردەڕەش بە نرخی ئازاد، عەبدولسەمەد تێلی گوتی: "کێشە و کەموکوڕی لە دابەشکردنی گاز لە هەموو پارێزگاکانی هەرێمی کوردستان هەیە و لە دهۆکیش ئەو کەموکوڕییە بەرچاو دەکەوێت، ئێمە بەوەدا دەزانین کە لیژنەکان لە چاودێریکردنی کارگەکانی دابەشکردنی گاز لە بەردەڕەش کەموکوڕییان هەیە، کە پشکی بەردەڕەش مانگانە 26 تانکەر گازە و پشکی ئامێدی 21 تانکەرە کە هەردووکیان رێژەی دانیشتووانیان وەکویەکە، بەڵام لە ئامێدی ئەو کێشەیە دروستنەبووە".