چیرۆکی ژێرئاوکەوتنی بەلەمێکی کۆچبەران لە ئیجە و خنکانی نۆ کۆچبەری کورد

 

ئەو کۆچبەرە باس لە رووداوی ژێرئاوکەوتنی بەلەمەکە رۆژی 23-12-2021 دەکات و دەڵێت: "کاژێر 6:20 خولەکی ئێوارەی رۆژی 22-12-2021 لە هۆتێل سیلین لە ناوچەی ئیشمیلیەی مەرمەڕیس لە پارێزگای موغڵای تورکیا لە لایەن قاچاخچییەکانەوە بەڕێکراین. سەرەتا ئەوانەی کە سەڵت بووین ژمارەمان 31 کەس بوو و ئەوانەش کە کەسانی دیکەیان لەگەڵ بوو 47 کەس بوو؛ براینە نێو جەنگەڵ و دواتر براینە ئەو شوێنەی کە تێیدا یەخت و بەلەمەکان لەنگەر دەگرن. بەڵێنیان پێدابووین کە بەلەمێکی 16 مەتری ئامادەبێت و بمانگوازێتەوە، بەڵام کە چووینە شوێنی مەبەست دەبینین کە بەلەمەکە تەنیا 12 مەترە. ئەو کاتە ژمارەی کۆچبەرەکان بەگشتی 103 کەس بوو؛ 84یان گەورە و 19ەکەی دیکەیان منداڵ بوون و بەزۆر هەموومان سەرخراین بۆ نێو بەلەمەکە."

 

کۆچبەرەکە دەڵێت، کاژێر 02:00ـی شەو بەلەمەکە کەوتە جووڵە و دوای چوار کاژێر کێشەی تێکەوت. دوو دەریاوانمان لەگەڵ بوون و گوتیان کە خەڵکی قیرغیزستانن؛ کێشەکەیان چارەسەرکرد."

 

کۆچبەرەکە چیرۆکی نێو دەریا بۆ تۆڕی میدیایی رووداو دەگێڕێتەوە و دەڵێت، شوێن نەبوو لەنێو بەلەمەکە دابنیشن و شەپۆلی دەریاش زۆر بەهێزبوو و هەربۆیە چەند جارێک بەلەمەکەیان لەکارکەوت و هەوڵی چاککردنەوەی درا.

 

کۆچبەرەکە دەڵێت: "لە رۆیشتن بەردەوامبووین تاوەکو کاژێر 14:00ی رۆژی 23-12-2021 بەلەمەکە بەتەواوی پەکیکەوت و بزوێنەرەکانی لەکارکەوتن و کوژایەوە.  دەریاوانەکان بێئومێد بوون؛ شەپۆلەکان زۆر بەهێز بوون و بەلەمەکەیان لەگەڵ خۆیان دەبرد؛ بزوێنەرەکانی بەلەمەکە 5 خولەکی دیکە کەوتنەوە کار و  دواتر بە تەواوی لەکارکەوتن؛ شەپۆلەکان بۆ دوورگەیەکی بەردینیان بردین؛ هیچ رێگەیەکی دابەزین نەبوو؛ بەلەمەکە ئەوەندە بەر بەردەکان کەوت کە لە چەند لایەکەوە شکا و ئەوانەی کەوتنە خوارەوە و شەپۆلەکە لەگەڵ خۆیان بردنی ژمارەیان 11 کەس بوو و خنکان."

 

وەک ئەو هاونیشتمانییە دەڵێت،  سێ کەس خەڵکی کەرکووک کە داپیرە و کچ و کچەزا بوون، خێزانێکی دیکە حەوت کەس بوون کە خەڵکی هەڵەبجە بوون و یەکێکیان ژنێک بوو و خنکا، بەڵام ئەوانی دیکە رزگار بوون؛ دوو منداڵ خەڵکی قەڵادزێ بوون و خنکان؛ سێ کەسی دیکەش کە دایک و کوڕ و کچێکی خەڵکی دهۆک بوون؛ دووکەسی دیکەش خەڵکی ئەفغانستان بوون و ئەوانە گیانیان لەدەستدا."