رووداو دیجیتاڵ
کشتوکاڵی شاری قەسری شیرینی پارێزگای کرماشان دەڵێت، ئەم ساڵ بەرهەمی خورما لە باخەکانی شارەکە نزیکەی 4000 تۆن دەبێت.
جەبار خودامورادی، بەڕێوەبەری کشتوکاڵی قەسری شیرین رایگەیاند، "بەرهەمی خورما لە هەر هێکتارێکدا لە ناوچەکەماندا تێکرا 6 تۆنە، نرخی یەک کیلۆ خورمای ناوچەکەش بەپێی جۆر و کوالێتییەکەی لەنێوان 80 هەزار تمەن تاوەکو 120 هەزار تمەندایە."
بە گوتەی جەبار خودامورادی، رووبەری باخەکانی خورما لە ناوچەی قەسری شیرین 900 هێکتارە، کە 650 هێکتاری بەبەرە. ئاماژە بەوەش دەکات، ئێستا 20 جۆر خورما لە ناوچەکەدا بەرهەم دەهێندرێن.
بەڕێوەبەری کشتوکاڵی قەسری شیرین دەڵێت، "باخە خورماکان 300 هەلی کاری سەرەکی و 600 هەلی کاری کاتییان بۆ خەڵکی ناوچەکە رەخساندووە." ئاماژە بەوەش دەکات، بەناوبانگترین جۆری خورمای ناوچەکە خورمای زاهیدیە کە 55% بەرهەمی خورمای ئەو سنوورە پێکدەهێنێت.
رۆژی 31ی تشرینی یەکەمی 2024، یەکەمین فێستیڤاڵی خورما لە شاری قەسری شیرینی کرماشان بە بەشداری هەزاران کەس لە خەڵکی ناوچەکە و شارەکانی دەوروبەر بەڕێوەچوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ