رووداو- هەولێر
سەرۆکی حکومەتی هەرێمی کوردستان لەگەڵ بریکاری وەزیری بەرگریی ئەمریکا کۆبوەوە و بریکاری وەزیری بەرگریی ئەمریکا پابەندبوونی وڵاتەکەی بۆ پشتگیریکردنی هەرێمی کوردستان دووپاتکردەوە.
راگەیاندنی ئەنجوومەنی وەزیرانی هەرێمی کوردستان بڵاویکردەوە، ئەمڕۆ دووشەممە 2019-11-25 مەسروور بارزانی، سەرۆکی حکومەتی هەرێمی کوردستان لەگەڵ جۆن روود، بریکاری وەزیری بەرگریی ئەمریکا بۆ کاروباری سیاسی کۆبووەوە.
لە دیدارەکەدا شۆڕش ئیسماعیل، وەزیری پێشمەرگە و رێبەر ئەحمەد، وەزیری نێوخۆ ئامادەی بوون، بریکاری وەزیری بەرگریی ئەمریکا پابەندبوونی وڵاتەکەی بە پشتگیریکردنی هەرێمی کوردستان دووپاتکردەوە و ئاماژەی بەوەشکرد کە سەردانی مایک پێنس، جێگری سەرۆکی ئەمریکا بۆ هەولێر دووپاتکردنەوەی ئەو پشتیوانییەی ئەمریکا بوو بۆ هەرێمی کوردستان.
بریکاری وەزیری بەرگریی ئەمریکا هەروەها جەختی لە بەردەوامیدان بە یارمەتیدانی ھێزی پێشمەرگە و گرنگی بەردەوامبوونی هاوئاهەنگی لەنێوان پێشمەرگە و هێزەکانی عێراق بۆ رووبەڕووبوونەوەی هەڕەشەکانی داعش کردەوە.
سەرۆکی حکومەتی هەرێمی کوردستان سوپاسی پشتیوانی ئەمریکای کرد و دووپاتیکردەوە، هەرێمی کوردستان وەک فاکتەرێکی سەقامگیربوونی ئاسایش لە ناوچەکەدا رۆڵی خۆی دەگێڕێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ