لە وانی باکووری کوردستان 23 کەس بە تۆمەتی قاچاخیکردن بە کۆچبەران دەستبەسەرکران
رووداو دیجیتاڵ
هەفتەی رابردوو لە پارێزگای وانی باکووری کوردستان 23 کەس بە تۆمەتی قاچاخیکردن بە کۆچبەرانەوە دەستبەسەرکران، ئەمڕۆ دادگە بڕیاری زیندانی کردنی بۆ 14 کەسیان دەرکرد.
بەگوێرەی راگەیێندراوی بەڕێوەبەرایەتیی گشتیی پۆلیسی وان کە رۆژی دووشەممە، 25ـی ئەیلوولی 2023 بڵاوکراوەتەوە، تیمەکانی هۆبەی دەروازە سنوورییەکان و بەرەنگاربوونەوەی قاچاخیکردن بە کۆچبەران سەر بە بەڕێوەبەرایەتیی گشتیی پۆلیسی وان لەو ئۆپەراسیۆنانەدا کە لە رۆژانی 17-24ـی ئەیلوولی 2023 ئەنجامیانداوە، 23 کەسیان بەتۆمەتی قاچاخیکردن بە کۆچبەرانەوە دەستبەسەرکردووە.
دوای گرتنەبەری رێکاری یاسایی لە بەڕێوەبەرایەتی گشتیی پۆلیسی وان، هەموو دەستبەسەرکراوان بەتۆمەتی قاچاخیکردن بە کۆچبەران دادگەیی کران. بە بڕیاری دادگە 14 کەسیان خرانە زیندانەوە و نۆ کەسەکەی دیکەش بە مەرجی دادوەری ئازاد کران.
هەرچەندە تورکیا سنوورەکانی خۆی لەگەڵ ئێران بە دروستکردنی دیواری کۆنکرێتی توند کردووە، پەڕینەوەی کۆچبەرانی ئەفغانی لە رۆژهەڵاتی کوردستانەوە بەردەوامە و رۆژانە دەیان کۆچبەر دوای پەڕینەوەیان لە سنوور لە ناوچەکانی سنووری پارێزگای وان دەستبەسەردەکرێن.
لە ئۆپەراسیۆنێکدا کە رۆژی شەممە، 23ـی ئەیلوول لە چوار پارێزگای تورکیا ئەنجامدرا، 85 کەس بەتۆمەتی قاچاخیکردن بە کۆچبەرانەوە دەستبەسەرکران، لەو ژمارەیە 64یان بە بڕیاری دادگە زیندانی کران.