رووداو دیجیتاڵ
فەرماندەیی هێزەکانی پاراستنی گەل (هەپەگە)، ناسنامهی دوو گەریلای پارتی کرێکارانی کوردستان (پەکەکە) ئاشكرا دهكات كه لە شهڕ و پێكدادان له دژی سوپای تورکیا لە خاکی هەرێمی کوردستان گیانیان لەدەستداوە.
ئەمڕۆ یەکشەممە 25ـی ئابی 2024، ناوەندی راگەیاندن و چاپهمهنیی هێزەکانی پاراستنی گەل (هەپەگە) ناسنامەی ئەو دوو گەریلایەی بڵاوکردەوە کە لە مانگی نیسانی 2024 لە ناوچەی خواکوڕک لە هەرێمی کوردستان لە شەڕ و پێکدادان لە دژی سوپای تورکیا، لە چوارچێوەی ئۆپەراسیۆنی ناسراو بە چنگ – قوفڵدا گیانیان لەدەستدابوو.
ناسنامەی گەریلاکان بەمشێوەیەن؛ نوربەهار کاراداغلی ناسراو بە تیژدا ژیان لەدایکبووی رووها و بەهار ئاکیۆل ناسراو بە فاراشین گابار، لە دایکبووی شرنەخ.
رۆژی 20ـی مانگ، ناوەندی چاپەمەنی و راگەیاندنی هێزەکانی پاراستنی گەل (هەپەگە) کوژرانی دوو سەرباز و خستنەخوارەوەی دوو درۆن و خاپوورکردنی چوار رەبیەی هێزەکانی تورکیا لە ئەنجامی ژمارەیەک هێرشیان لە ناوچەکانی مەتین و زاپ لە خاکی هەرێمی کوردستان بڵاوکردەوە.
رۆژی 23ـی مانگ، وەزارەتی بەرگریی تورکیا لە راگەیێندراوێکدا بڵاویکردەوە لە ئۆپەراسیۆنێکی ئاسمانیدا چوار گەریلای پەکەکە لە رێگەی فڕۆکە جەنگییەکانی ئێف 16 و درۆنەکانیانەوە لە ناوچەکانی خواکوڕک مەتین و گارا لە خاکی هەرێمی کوردستان کردووەتە ئامانج.
ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ