کوردستان
سەردانی قوباد تاڵەبانی بۆ کێڵگەی گازی کۆرمۆر بە یاوەریی وەزیرانی پێشمەرگە و سامانە سرووشتییەکان بە وەکالەت
رووداو دیجیتاڵ
جێگری سەرۆکوەزیرانی هەرێمی کوردستان سەردانی کێڵگەی گازی کۆرمۆری کرد و دڵنیاییدا "کار دەکەین لەپێناو پاراستنی ژیانی کارمەندانی ناو کێڵگەکە." هەروەها گوتەبێژی قوباد تاڵەبانی دەڵێت، پێداویستیی هاووڵاتییان لە گاز "پارێزراو دەبێت."
قوباد تاڵەبانی، جێگری سەرۆکوەزیرانی هەرێمی کوردستان بەیاوەری وەزیرانی پێشمەرگە و سامانە سرووشتییەکان بە وەکالەت و بەرپرسانی دیکەی ئەمنی، شە‌وی 25 لەسەر 26ـی حوزەیران، سەردانی کێڵگەی غازی کۆرمۆری کرد و لەگەڵ بەرپرسانی کۆمپانیای دانا گاز کۆبووەوە.
سەمیر هەورامی، گوتەبێژی قوباد تاڵەبانی بە تۆڕی میدیایی رووداوی راگەیاند، لە کۆبوونەوەکەدا باس لە هێرشە مووشەکییەکانی سەر پرۆژەی فراوانکردنی کێڵگەی گازی کۆرمۆر و گفتوگۆ لەبارەی دۆخی ئەمنیی و بەرهەمهێنانی گاز کراوە.
بەگوێرەی گوتەبێژەکەی، قوباد تاڵەبانی دڵنیایی داوە "کاردەکەن لەپێناو پاراستنی ژیانی کارمەندانی ناو کێڵگەکە" و ئەوان وەکو حکومەتی هەرێمی کوردستان "بە هیچ شێوەیەک رێگرنین لەبەردەم هاتووچۆی کارمەندان و لەگەڵ لایەنە پەیوەندیدارەکانی عێراق لەسەر خەت دەبن بەمەبەستی بەرگرتن لە روونەدانی ئەو جۆرە هێرشانە."
لەبارەی کاریگەریی هێرشەکان لەسەر بەرهەمهێنانی گازی سرووشتی و گازی ماڵان، سەمیر هەورامی دەڵێت، "ئەم جۆرە هێرشانە کاریگەرییان نابێت و کارکردن لە کێڵگەکە ئاساییە.. پێداویستیی هاووڵاتییان پارێزراو دەبێت."
سەبارەت بە رێگەنەدان بە چوونە دەرەوەی کارمەندانی کێڵگەکە، گوتەبێژی قوباد تاڵەبانی باسی لەوە کرد، "تەنیا بۆ پاراستنی گیانی کارمەندەکان بووە، ئێستا دۆخەکە ئاساییە و کارکردن و بەرهەمهێنانی گازی سرووشتی بەردەوامیی هەیە."
🔴ئێستا گەیشت؛ قوباد تاڵەبانی گەیشتە کێڵگەی گازی کۆرمۆر
— Rudaw (@Rudawkurdish) June 25, 2022
ئەمشەو قوباد تاڵەبانی، جێگری سەرۆکوەزیرانی هەرێمی کوردستان بە یاوەریی وەزیرانی پێشمەرگە و سامانە سرووشتییەکان بە وەکالەت و بەرپرسانی دیکەی ئەمنی سەردانی کێڵگەی گازی کۆرمۆری کرد و لەگەڵ بەرپرسانی کۆمپانیای دانا گاز کۆبووەوە pic.twitter.com/5vQU5jWwbD
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ