ئایدن مەعرووف: پێشنیازی نێچیرڤان بارزانی بۆ بەشداریی پێکهاتەکان لەناو هێزی پێشمەرگە زۆر پێویستە

 

رۆژی سێسەممە 24-5-2022 ئایدن مەعرووف، وەزیری هەرێم بۆ کاروباری پێکهاتەکان لە حکومەتی هەرێمی کوردستان میوانی بوولتەنی کۆڕۆژی رووداو بوو و رایگەیاند: "پێشنیازی سەرۆکی هەرێمی کوردستان بۆ بەشداریکردنی پێکهاتەکان لەناو هێزی پێشمەرگە زۆر گرنگە، هێزی پێشمەرگە هێزێکی نیشتمانییە و ئێستا بەشداریکردنی پێکهاتەکان لەو هێزەدا گرنگە، سەرۆکی هەرێمی کوردستان لەو بابەتەدا جیددییە، ئەو لە هەموو کاتێکدا پشتیوانی مافی پێکهاتەکانی لەسەر ئاستی عێراق و هەرێمی کوردستاندا کردووە".

 

وەزیری هەرێم بۆ کاروباری پێکهاتەکان لە حکومەتی هەرێمی کوردستان گوتی: "بەشداریپێکردنی پێکهاتەکان لە بڕیارە سیاسییەکان و لە پەرلەمانی کوردستان و ئەنجوومەنی وەزیران، کارێکی باشە و پێویستە زیاتر گرنگی و پەرەی پێبدرێت بۆ ئەوەی ئەو بەشداریپێکردنە بە شێوەیەکی کارابێت، پێش راپەڕین تورکمان، کلدان، سریان و ئاشووری لە شۆڕشەکانی کوردستاندا بەشداربوون و لە راپەڕینیشدا لەگەڵ پێشمەرگە بەشدارییان کردووە".

 

بە گوتەی ئایدن مەعروف: "بوونی پێکهاتەکان لە هەرێمی کوردستاندا گرنگە و بەشدارییان لە هێزی پێشمەرگە و کەرتی ئاسایشدا لەڕووی مەعنەوییەوە زۆر گرنگە، بەوەی هیچ جیاوازییەک لەنێوان هاووڵاتییان بە هەر رەنگ و بۆچوونێکەوە نییە و لە ئەنجامدا هەموویان هاووڵاتیی هەرێمی کوردستانن، بۆیە ئەو پێشنیازەی سەرۆکی هەرێمی کوردستان ئێجگار گرنگە و پێویستە کاری لەسەر بکرێت".

 

ئایدن مەعرووف پێیوایە، لە هەرێمی کوردستان پێکەوەژیانێکی باش و بەهێز هەیە، ئەو پێکەوەژیانە بەرەوپێش دەڕوات و گرنگی پێدەدرێت، ئەوەش دەگەڕێتەوە بۆ کولتووری یەکترقبووڵکردنی هاووڵاتییان لە هەرێمی کوردستان.

 

لەبارەی رێژەی بەشداریکردنی پێکهاتەکان لەناو هێزی پێشمەرگە و هێزە ناوخۆییەکانی هەرێمی کوردستان، ئایدن مەعرووف رایگەیاند: "بەشێوەیەکی فەرمی داتایەک نییە بۆ ئەوەی بزانین رێژەی بەشداریپێکردنی پێکهاتەکان لە هێزی پێشمەرگە و وەزارەتی ناوخۆ چەندە، بەڵام لەگەڵ هێرشی داعش بۆ موسڵ و شنگال و دەشتی نەینەوا و ناوچەکانی دیکە، لەناو هێزی پێشمەرگەدا هێزی تایبەت بۆ کاکەیی و ئێزدی و کریستیانەکان دروستکران، تەنانەت داواکرا هێزی تایبەت بۆ پێکهاتەی تورکمان لە ناوچەکانی موسڵ و تەلەعفەر دروستبکرێت بۆ ئەوەی لەگەڵ هێزی پێشمەرگە بەیەکەوە بەرگریی لەو ناوچانە بکەن".

 

هەروەها باسی لەوەش کرد، "راستە داتایەک بەردەست نییە بۆ ژمارەی بەشداریکردنی پێکهاتەکان، بەڵام پێکهاتەکان لە هێزی پێشمەرگە و وەزارەتی ناوخۆدا، هەم لە پۆلیس و هەمیش لە ئاسایشدا بەشدارن، ئەمەش بابەتێکی زۆر باشە و دەبێت ئەو ئامادەییە چالاکتر و زیاتریش بکرێت".

 

بۆ ئەوەی بە کردەیی کار لەسەر پێشنیازەکەی سەرۆکی هەرێمی کوردستان بکرێت، ئایدن مەعرووف دەڵێت: "سەرۆکی هەرێمی کوردستان کارێزمایەکی سیاسیی بەهێزە و لەناو کەسایەتییە سیاسییەکاندا وەک کەسێکی میانڕەو ناسراوە و بەردەوام بەرگریی لە پێکەوەژیان و مافی پێکهاتەکان کردووە، ئەو پێشنیازەی لەم کاتەدا زۆر گونجاو و پێویستە، دەبێت لە داهاتوودا بە شێوەیەکی کردەیی و بە جیددی کاری لەسەر بکرێت و بە راوێژ لەگەڵ لایەنی سیاسیی پێکهاتەکان، پشتیوانی ئەوانیشی بخرێتە پاڵ بۆ بەشداریپێکردنی ئەو پێکهاتانە لەناو هێزە ناوخۆییەکان و وەزارەتی پێشمەرگەدا".